Masakrimi i biznesmenit 82-vjeçar në kazanin e plehrave, ka për autor të dyshuar një 37-vjeçar, kurse si shkak i krimit makabër janë deklaruar motivet e dobëta.
Policia e Fierit njoftoi sot se ka shoqëruar dhe më pas arrestuar si të dyshuar Skënder Krasniqin, banues në këtë qytet dhe po vijon hetimet për personat e tjerë të përfshirë në ngjarje, apo që kanë dijeni.
Gjatë marrjes në pyetje i dyshuari ka thënë se Novruz Likometaj i ngacmonte seksualisht nënën dhe kjo u bë shkak që ai ta vriste në gjaknxehtësi. I moshuari mësohet se kërkonte të martohej përsëri, pasi nuk kishte grua.
Pas vrasjes së Novruz Likometajt dhe gjetjes së kufomës në kazanin e plehrave 300 metra larg shtëpisë, i mbështjellë me çarçaf, u hetua në dy pista.
Krim i mundshëm në familje dhe vrasje për shkak të konkurrencës në biznes. Likometaj, ish-kryetar i sindikatës së transportit, kishte në pronësi me djemtë një agjenci turistike udhëtimi, “Likometa Travel”, të linjës Shqipëri-Greqi.
Burime zyrtare të policisë thanë se presin rezultatet e kampioneve të dërguara në Laboratorin e Policisë Shkencore, për gjurmët biologjike dhe shenja të tjera të gjetura gjatë këqyrjes së trupit të viktimës. Familjarët kanë mohuar të kishin konflikte dhe kanë dëshmuar se nuk kanë pasur informacion për vendndodhjen e 82-vjeçarit orët që ka ndodhur krimi.
Pas ekspertizës mjeko-ligjore rezultoi se trupi i viktimës ishte masakruar nga goditje me mjet prerës thikë, dhe se goditja vdekjeprurëse ishte bërë në fyt, por ka pas edhe goditje me mjete të forta.
Nga ana tjetër, ekspertiza vërtetoi se vrasja trupi është hedhur në koshin e mbeturinave vetëm pak orë përpara se të gjendej nga personat që lajmëruan policinë.
