Ministrja e Arsimit të Lartë, Kërkimit dhe Inovacionit në Francë, Frédérique Vidal, ka deklaruar këtë të hënë se rezultatet e para të testimit të kurave të ndryshme për COVID-19 pritet të dalin në fund të kësaj jave.
E ftuar në Franceinfo, ajo tha se janë katër lloje të ndryshme trajtimesh që kanë nisur të testohen 4 javë më parë në më shumë se 3 mijë vullnetarë në shkallë Europiane.
“Testet po shkojnë mirë, ne mendojmë se do të kemi përfundimet e para në fund të kësaj jave mbi efektivitetin e molekulave që po testohen në mënyrë që të mund t’i zgjasim këto teste, të heqim molekulat dhe të shtojmë të tjera”, tha Vidal.
Aktualisht katë trajtimet që po testohen për kurimin e COVID-19 janë Remdesivir, i cili u përdor për trajtimin e Ebola, Lopinavir-Ritonavir , e njohur për trajtimin e HIV, Hydroxychloroquine i kombinuar me azitromicinë , i njohur për trajtimin e malaries dhe interferon-beta.
“Është shumë e rëndësishme që të kemi rezultate që prodhohen sipas rregullave sepse kjo do të jetë një mundësi për trajtimin potencial të dhjetëra mijëra njerëzve, kështu që duhet të bëhet me një metodologji rigoroze”, shtoi ministrja franceze. /Opinion.al
