Kryeministri izraelit Benjamin Netanyahu tha të shtunën se nuk mund të ketë armëpushim të përhershëm në Gaza derisa Hamasi të shkatërrohet, duke vënë kështu në dyshim një pjesë kyçe të propozimit të armëpushimit që Presidenti i SHBA Joe Biden tha se Izraeli kishte bërë vetë.
Përmes një deklarate të zyrës së shtypit, Kryeministri Netanjahu bëri të ditur se kushtet e Izraelit për përfundimin e luftës nuk kanë ndryshuar dhe duke renditur tre prej tyre: shkatërrimi i aftësive ushtarake dhe qeverisëse të Hamasit, lirimi i të gjithë pengjeve dhe sigurimi që Gaza të mos përbëjë më kërcënim për Izraelin.
Udhëheqësi i opozitës Yair Lapid i kërkoi Netanyahut të binte dakord për një marrëveshje pengjesh dhe armëpushimi, duke thënë se partia e tij do ta mbështeste atë edhe nëse fraksionet e krahut të djathtë në koalicionin qeverisës rebeloheshin. Sipas tij, qeveria e Izraelit nuk mund të injorojë angazhimin e Presidentit Biden.
Në anën tjetër, Hamasi iu përgjigj pozitivisht planit izraelit për një armëpushim në Gaza. Në një deklaratë të lëshuar nga grupi militant thuhet se e mori propozimin me ndërmjetësimin e Katarit dhe se ishte i gatshëm të angazhohej në një armëpushim të përhershëm që do të çonte në tërheqjen e forcave izraelite, rindërtimin e Gazës, kthimin e të zhvendosurve dhe një marrëveshje “të vërtetë” të shkëmbimit të të burgosurve.
Biden tha të premten se Izraeli kishte propozuar një marrëveshje që përfshin një armëpushim fillestar gjashtë-javor me një tërheqje të pjesshme ushtarake izraelite dhe lirimin e disa pengjeve ndërsa të dy palët duhet te negocionin “një fund të përhershëm të armiqësive“.
