39 të burgosur palestinezë janë liruar nga burgjet izraelite në këmbim të një grupi pengjesh të mbajtura nga Hamasi.
Marrëveshja e ndërmjetësuar nga Katari, përfshin një pauzë katër-ditore në luftime.
Ata akuzohen për një sërë veprash, nga gjuajtja me gurë deri te tentativa për vrasje. Disa u dënuan ndërsa të tjerët ishin në pritje të gjykimit.
Grupi prej 24 femrash dhe 15 djemsh adoleshentë u lirua nëpër pikën e kontrollit Beituniya në Bregun Perëndimor.
Ata më pas do të lejohen të kthehen në shtëpi, sipas shërbimit të burgut të Izraelit.
Të burgosurit u zgjodhën nga një listë prej 300 grave dhe të miturve të përpiluar nga Izraeli.
Më pak se një e katërta e atyre në listë janë dënuar – shumica dërrmuese po mbahen në paraburgim në pritje të gjykimit. Shumica e të listuarve janë djem adoleshentë – 40% e tyre nën moshën 18 vjeç. Ka gjithashtu një vajzë adoleshente dhe 32 gra.
Disa nga turma tundnin flamujt e Hamasit, por të tjerë folën për unitetin palestinez, një moment i vogël fitoreje në mes të një lufte rraskapitëse.
Për Izraelin, të burgosurit e liruar janë një kërcënim sigurie; për palestinezët e mbledhur këtu për t’i përshëndetur, ata janë viktima të okupimit të Izraelit – dhe lirimi i tyre është një simbol.
Izraeli dhe Hamasi arritën një marrëveshje në fillim të kësaj jave për lirimin e 50 pengjeve të mbajtura në Gaza gjatë pauzës katër-ditore të luftimeve.
Marrëveshja duhet të lirojë gjithsej 150 palestinezë të mbajtur në burgjet izraelite dhe një rritje të konsiderueshme të ndihmës humanitare të lejuar në Gaza. Rreth 60 kamionë që transportonin furnizime mjekësore, karburant dhe ushqime hynë nga Egjipti të premten.
Hamasi mori më shumë se 200 pengje gjatë një sulmi ndërkufitar në Izraelin jugor më 7 tetor, në të cilin u vranë 1200 njerëz.
Organizatat e të drejtave të njeriut thonë se numri i palestinezëve të mbajtur pa akuza në burgjet izraelite është rritur që nga sulmet e 7 tetorit./Opinion.al
