Vazhdon të mbetet e tensionuar situata në Lindjen e Mesme, pasi ditën e hënë në kufirin mes Izraelit dhe Libanit janë konfirmuar episode lufte.
Forcat Mbrojtëse të Izraelit deklaruan se kanë zmbrapsur një përpjekje të një grupi militantësh të lëvizjes islamike Hezbollah, për të depërtuar në territorin e tij, duke hapur zjarr ndaj personave të armatosur, menjëherë pasi ata kaluan kufirin nga Libani.
“Terroristët u larguan përsëri në Liban, pasi u qëlluan”, tha ushtria izraelite.
Sipas kryeministrit Beniamin Netanjahu, militantët përbënin një rrezik serioz për sigurinë.
Gjatë javës së kaluar ka pasur tensione në rajon, pasi një luftëtar i grupit militant të Hezbollahut, me bazë në Liban, është vrarë në një sulm të dyshuar izraelit në Siri.
Hezbollahu tha se nuk ka qenë i përfshirë në përleshjen e fundit kufitare.
Hezbollahu, i cili mbështetet nga Irani, operon kryesisht në jug të Libanit dhe, së bashku me aleatët e tij politikë, është një forcë me ndikim në Qeverinë e këtij vendi.
Ky grup po ashtu mbështet forcat besnike të presidentit sirian, Bashar al-Asad, në luftën civile të Sirisë./ Opinion.al
