Palestinezët në Gaza po jetojnë në kushte çnjerëzore. Njerëzit në veriun e izoluar të enklavës konfirmojnë për BBC se fëmijët kalojnë ditë pa ushqim, ndërsa kamionëve me ndihma humanitare u ndalohet vazhdimisht hyrja.
Përballë këtij kërcënimi për ekzistencë, shumë po detyrohen që të bluajnë ushqim për kafshët për ta konsumuar në mënyrë që të mbijetojnë. Por thonë se edhe ai lloj ushqimi është duke përfunduar. Njerëzit gjithashtu kanë gërmuar shumë poshtë në tokë për të patur qasje në tubacionet e ujit, për ta përdorur për konsum dhe larje. Organizata e Kombeve të Bashkuara ka lëshuar alarmin serioz se kequshqyerja tek fëmijët në veri është rritur me ritme shqetësuese.
Agjencia e OKB-së për koordinimin humanitare, konfirmon se shumë se gjysma e ndihmave për veriun e Gazës nuk janë lejuar të futen në atë pjesë të enklavës. Vlerësohet se aty po qëndrojnë 300 mijë njerëz, të cilët rrezikojnë jetën nga uria. Izraeli është përgjigjur duke dhënë një deklaratë të prerë se në Gaza nuk ka vdekje nga Rusia.
Situata nuk paraqitet e mirë as në jugun e tokës palestineze. Sulmet e fundit izraelite në qytetin Rafah, në kufirin me Egjiptin, u kanë marrë jetën 28 personave, raportojnë mediat ndërkombëtare.
Bombardimet e rënda, në atë që konsiderohet një zonë civilësh dhe refugjatësh, erdhën disa orë pasi kryeministri izraelit Benjamin Netanjahu, urdhëroi ushtrinë të planifikonte një largim të qindra mijëra personave nga jugu i Gazës, përpara nisjes së një pushtimi tokësor. Ai nuk ka detajuar asgjë nga ky plan, i cili ka ngjallur panik mes palestinezëve.
Në jugun e Gazës po qëndrojnë më shumë se gjysma e 2.3 milionë banorëve të enklavës. Mbi 600 mijë vlerësohen të jenë fëmijë.
