Një llogari bankare me vlerë 30 mijë euro është sekuestruar nga Gjykata, me kërkesë të Prokurorisë, në emër të një gruaje, pasi burri i saj u arrestua me drogë jashtë Shqipërisë.
Sipas burimeve të hetimit, Policia ka grumbulluar të dhëna që krijojnë dyshime në lidhje me shtetasin R. Dh., i datëlindjes 1981. Sipas Policisë, bashkëshortja e tij ka përfituar në llogarinë e saj individuale 56 900 euro nëpërmjet 4 transfertave të urdhëruara nga një kompani në Zvicër me përshkrimin “finanziamento”. Tri transfertat e para të mbërritura në këtë llogari në shumën prej 36,927 eurosh janë tërhequr pjesë – pjesë në cash, me qëllim investimin e tyre në biznes. Nga informacione të tjera rezulton se ajo është ortake me 100% të aksioneve dhe përfaqësuese ligjore në një subjekt të regjistruar në Tiranë. Në këtë aktivitet tregtar, ajo bashkëpunon edhe me shtetasin R. Dh., për të cilin ka deklaruar se është bashkëshorti i saj, madje është ai i cili ka realizuar edhe “marrëveshjen e borxhit” me subjektin zviceran “Tunimara SA”. Gjithashtu, edhe R. Dh. ka çelur llogari pranë një banke. Nga verifikimet dhe të dhënat e grumbulluara në lidhje me shtetasin R. Dh., si dhe familjarëve të tij, janë marrë të dhëna nga Interpoli.
Sipas informacionit shkresor me nr. 5051KL/6 Prot., datë 09.09.2015, ndër të tjera bëhet me dije se R. Dh. është arrestuar më datë 29.03.2009 dhe dënuar për veprën penale të “trafikimit të lëndëve narkotike” në lidhje me sasinë prej 5.148 kg heroinë me 5 vjet e 4 muaj burgim në Itali. Në datën 11.04.2016 ai ka derdhur cash pranë një banke shumën prej 30.000 eurosh, për të cilat ka deklaruar se i ka marrë hua nga një shtetas në Milano. Kjo shumë është sjellë fizikisht /cash në territorin e Republikës së Shqipërisë nga huadhënësi, sipas itinerarit ZvicërItaliShqipëri, pasqyruar kjo edhe në formularin e deklarimit në pikën e kalimit kufitar. Sipas Prokurorisë, nga hetimi krijohen dyshime se shuma 30 000 euro është krijuar mbi bazën e të ardhurave të krijuara nga aktiviteti kriminal i tregtimit të lëndëve narkotike dhe për këtë arsye është vendosur të sekuestrohet.
