Vëmendja e autoriteteve italiane është përqëndruar në Puglia ku nga Shqipëria mund të vërshojë vala e re emigrantëve, të bllokuar aktualisht në Greqi.
Ministri i Brendshëm italian, Anxhelino Alfano në një intervistë për gazetën “Il Messaggero” tha se ekziston rreziku i hapjes së një rruge të re për emigrantët nga Shqipëria drejt Italisë.
“Po përgatitemi të përfocojmë bashkëpunimin me Shqipërinë, si në kufirin e tyre me Maqedoninë dhe Greqinë si edhe përgjatë bregdetit. Kemi programuar të gjithë instrumentet e pritjes. Të mos harrojmë se prej eksodit shqiptar në Puglia kemi një eksperiencë tashmë të maturuar, sa i takon pritjes së flukseve të emigrantëve”.
Ndërkohë kancelarja gjermane, Angela Merkel tha se Europa nuk do të lejojë që Greqia të bjerë në “kaos”, duke kritikuar vendimin e disa vendeve për të mbyllur kufijtë.
Sipas autoriteteve greke numri i emigrantëve të bllokuar aktualisht në Greqi është 20 mijë, por muajin e ardhshëm parashikohet të arrihet në 70 mijë. /Tv Klan
