Dy të rinj janë arrestuar nga policia italiane pasi kanë qëlluar me armë zjarri. Ngjarja ka ndodhur rreth orës 22:30 të së shtunës, përballë një lokali në Maltigano, Itali. Në pranga ka rënë 24 –vjeçari shqiptar, identiteti i të cilit ende nuk bëhet i ditur dhe shoku i tij italian nga Ascoli.
Sherri në lokal ka nisur mes italianit dhe banakierit për një vajzë, kliente e lokalit. Pronari i lokalit i ka kërkuar 26 – vjeçarit që të largohet. Ky i fundit është larguar nga lokali, por më pas ka thirrur shokun e tij shqiptar dhe kanë qëlluar me armë zjarri në ajër.
Policia fillimisht ka vënë në pranga 26 – vjeçarin italian, ndërsa arrestimi i shqiptarit u bë më vonë pasi ai ishte arratisur. Ata akuzohen për veprën penale të kërcënimit dhe përdorimit të armës së zjarrit. Paraprakisht ata ndodhen në arrest shtëpiak në pritje të gjyqit.
