Dy shqiptarë dhe tre italianë janë arrestuar nga autoritetet italiane për vrasjen e Elson Kalaverit, ngjarje e ndodhur në Gusht të vitit 2022 në Sasso Pisano në Pisa.
Sipas mediave italiane, vrasja është porositur nga një shqiptar në shenjë hakmarrje për vdekjen e vëllait.
“Ai vendosi të merrte një grup vrasësish për të zbatuar atë që quhet “Kanuni” në Shqipëri”, shkruajnë mediat vendase.
Arrestimet janë kryer mëngjesin e sotëm në Castelnuovo Val di Cecina (një fshat në Pisa), Napoli, Casoria (një fshat në Napoli), Pescara dhe Shqipëri. Autoritetet italiane thonë se ata janë përgjegjës, në role të ndryshme, për vrasjen me paramendim të Elson Kalaverit.
Operacioni i autoriteteve italiane u quajt “Kanuni” dhe erdhi si rezultat i hetimeve të thelluara nga Karabinierët dhe Prokuroria në Pisa.
Nga verifikimet u zbulua se vrasja ishte porositur nga Shkelzen Xhelal Keçi, 41 vjeç, vëllai i Gent Keçit, për të marrë hak.
Ai mori një grup vrasësish me pagesë, që në rastin konkret janë tre italianë. Ndërsa shqiptari tjetër i arrestuar ka dhënë informacion mbi vendndodhjen e Kalaverit.
Elson Kalaveri, 36 vjeç nga Thumana, jetonte në provincën e Sienas. Ai u vra më 18 Gusht 2022 në një atentat mafioz pranë Sasso Pisano. Shqiptari po udhëtonte me makinën e tij, por si pasagjer, kur u ndalua nga një mjet tjetër.
Në këtë moment vrasësit qëlluan të paktën 15 herë mbi të. Shoferi i makinës ku udhëtonte Kalaveri, një tjetër shqiptar, nuk mori dëmtime. Ai shkoi menjëherë në fshat dhe kërkoi ndihmë. Bashkatdhetarë të tjerë të Kalaverit tentuan t’i japin ndihmën e parë, por ai humbi jetën.
Kalaveri është një emër i njohur edhe për policinë shqiptare. Në vitin 2014 ai u arrestua për vrasjen e një fqinji, por asokohe ai deklaroi se kishte vepruar për vetëmbrojtje.
Viktima ka pasur edhe precedentë penale në shfrytëzimin e prostitucionit në vendin fqinj.
