31-vjeçarja shqiptare që bashkëshorti tentoi ta mbyste dy ditë më parë në Itali, ka ndërruar jetë në spital.
Etleva Bodi po luftonte mes jetës dhe vdekjes në një shtrat spitali në San Paolo në Savona, në koma. Të dielën në mbrëmje mjekët deklaruan gruan të vdekur. Gjendja e saj e rëndë u shfaq menjëherë për mjekët e urgjencës, të cilët hynë në shtëpi me policinë dhe e gjetën tridhjetë e një vjeçaren pa puls.
Sipas një rikonstruksioni fillestar, natën mes të premtes dhe të shtunës, burri dhe gruaja kishin debatuar: gruaja ishte mbyllur në dhomën e gjumit dhe kishte marrë në telefon dikë. 41-vjeçari Selami Bodi e kishte dëgjuar duke folur, hapi derën dhe i vuri duart në qafë duke e mbytur. Ai e lëshoi 31-vjeçaren vetëm kur ajo nuk merrte më frymë. Pastaj ishte vetë ai që thirri ambulancën për ndihmë. Pas tetëdhjetë minutash rraskapitëse reanimimi dhe dhjetë injeksione adrenaline, mjekët kishin arritur të riaktivizonin funksionet jetësore të gruas. Por të dielën në mbrëmje në spital, shpresat pushuan.
E gjithë ngjarja ndodhi teksa katër fëmijët e çiftit, të moshës nga 5 deri në 11 vjeç, ishin në gjumë.
41-vjeçari Selami Bodi, një punëtor ndërtimi, tashmë ndodhet pas hekurave në burgun e Marassit, i akuzuar për vrasje.
