Arrestohet një 29 vjeçare nga Serbia pas për një sërë mashtrimesh kundër priftërinjve. Konkretisht, 29-vjeçarja serbe u arrestua nga policia italiane në Padova, pasi së fundmi i vodhi mbi 100 mijë euro një prifti.
Siç raportojnë mediat italiane, hetimi filloi në qershor 2024 pas një raporti nga Dioqeza e Padovës në lidhje me një grua të re që i ishte drejtuar një prelati duke i kërkuar ndihmë në përballimin e urgjencave dhe nevojave ndonjëherë joreale, duke i kërkuar atij shuma të ndryshme parash.
“Prifti viktimë, në një moment të caktuar, nuk ishte më në gjendje t’i përmbushte kërkesat dhe kështu kërkoi hua parash nga disa famullitarë, duke e çuar veten në varfëri dhe një borxh të konsiderueshëm.
Famullitarët, të cilët e respektonin priftin për mirësinë dhe vetëmohimin e tij, kishin shprehur më pas shqetësimet e tyre. E dyshuara kishte kërkuar mijëra euro në para: në një rast ajo kishte marrë 2,000 euro për të zgjidhur çështjen e qirasë; në një rast tjetër ajo kishte thënë se i duheshin para për trajtim spitalor; në një rast tjetër iu desh të paguante shpenzimet në Ambasadë për të zhbllokuar llogarinë e saj bankare”, shkruajnë mediat.
Nga ana tjetër 29-vjeçarja serbe ishte zhdukur pa lënë gjurmë, duke u zhvendosur në zonën e Ballkanit, derisa policia mësoi se ajo ishte kthyer në Padova, ku u gjurmua dhe u arrestua.
“Gruaja ishte e njohur për raste mashtrimi dhe zhvatjeje kundër të moshuarve dhe personave të dobët, si dhe kundër priftërinjve të tjerë. Policia zbuloi, ndër të tjera, se midis viteve 2012 dhe 2019, 29-vjeçarja i kishte vjedhur priftit 37 mijë euro, gjithmonë me të njëjtat justifikime që lidheshin me vështirësitë e saj. Midis majit dhe nëntorit 2024, asaj iu dhanë edhe 55 mijë euro të tjera”, raportohet nga mediat.
