Është arrestuar pas 10 vitesh, i shpallur në kërkim, një shtetas shqiptar në Itali. 39-vjeçari shqiptar rezultonte në kërkim për “pjesëmarrje në organizatë për trafikun e lëndëve narkotike”.
Lajmin e kanë bërë të ditur mediat e huaja, sipas të cilave, shqiptari ishte i dënuar në mungesë me 8 vite heqje lirie.
Gjithashtu bëhet me dije se ai lëvizte në vende të ndryshme të Europës me identitete të rreme.
Mësohet se 39-vjeçari u pikas gjatë një kontrolli rutinë të automjeteve që lëviznin në zonën e Rifredit.
Në një moment të kontrollit shqiptari filloi të shfaqte shenja nervozizmi dhe për të justifikuar shqetësimet e tij gjithnjë e më të dukshme në sytë e policisë, ai nxori nga xhepi rreth 5 gramë kokainë, duke ia dorëzuar vetë policit para se ai të zbulonte drogën e fshehur në makinë.
Pasi ai u shoqërua nga policia dhe iu morën gjurmët e gishtërinjve u zbulua se shqiptari ishte shpallur në kërkim prej 10 vitesh nga drejtësia italiane./Opinion.al
