Një shqiptar ka mbetur i vrarë pasi së bashku me dy persona të tjerë tentuan të vidhnin banesën e një italiani.
Ngjarja ka ndodhur në Villa Literno në Caserta, Itali. Pronari i shtëpisë ka qëlluar me armë zjarri në drejtim të tyre, ku për pasojë ka lënë të vdekur një shqiptar, rreth 40 – vjeç, identiteti i të cilit nuk bëhet i ditur ende.
Ka qenë vajza ajo që ka pikasur tre hajdutët në momentin që po kthehej në shtëpi, rreth orës 3:30 të natës pasi kishte qenë në një festë. Ajo ka lajmëruar menjëherë babain e saj me telefon pasi ka parë portën hapur dhe personat e panjohur që po largoheshin me makinë, ka thënë gruaja e italianit.
Gjithashtu ajo tha se burri i saj, vajza tjetër dhe djali po flinin në kohën kur hajdutët po largoheshin me një BMW të bardhë. Ata kishin arritur të merrnin edhe një portofol me një mijë euro si dhe çelësat e makinës.
Më pas pronari i shtëpisë ka qëlluar me armë zjarri duke lënë të vdekur njërin njërin prej tyre. Autori i vrasjes ka thënë se ishte hera e tetë që hajdutët shkonin në shtëpinë e tij për të grabitur dhe ishte lodhur nga kjo gjë./tvklan.al
