Islanda, një nga skuadrat debutuese në një Kampionat Europian, e cila likujdoi mbrëmë Anglinë dhe tashmë do të përballet me Francën në çerekfinale të “Euro 2016” ka dy trajnerë, gjë që është diçka e rrallë në futboll, aq më tepër në nivele të tilla ndërkombëtare. Dy trajnerët e kombëtares së shtetit ishullor, prej 330 mijë banorësh, janë suedezi Lars Lagerback dhe islandezi Heimir Hallgrimsson. Për të kuptuar këtë lloj zgjedhjeje, ne duhet të kthehemi në fillim të mandatit të tyre. Në vitin 2011, pas përvojës, sidomos me Suedinë, në kualifikimet e saj për pesë faza finalesh të turneve të mëdhenj, radhazi, në mes të viteve 2000 dhe 2008, Lagerback arriti në krye të kombëtares islandeze.
Federata e futbollit të këtij vendi vendosi ta emërojë atë trajner. Në krah të suedezit u afrua edhe Hallgrimsson, trajner i IBV në divizionin e parë të Islandës. Fillimisht, ndarja e roleve është klasike, me një trajner kryesor dhe një asistent, si Didier Deschamps dhe Guy Stephan, në ekipin Francës, fjala vjen, apo De Biazi dhe Tramezzani te Shqipëria. Lagerbäck dhe Hallgrimsson nisën të merrnin rezultate të menjëhershme. Ata e udhëhoqën Islandën, e cila ishte përtej vendit të 100-të në renditjen e FIFA-s, kur mbërritën në atë post, drejt shanseve reale të kualifikimit për në Botërorin e Brazilit, viti 2014.
Nëse nuk ia doli, kjo vetëm për shkak se humbi kualifikuesen e fundit kundër Kroacisë. Pas këtij momenti, që u quajt sukses, federata i vendosi të dy në pozita të barabarta, me titullin e trajnerit të Islandës. Hallgrimsson, së shpejti do të jetë i vetëm në drejtim, pas “Euro 2016”, turneu i parë i madh në historinë e vendit të tij. Sipas parashikimeve, do të kemi njëlloj dorëzimi të butë të Lars Lagerback, i cili do të largohet nga kombëtarja islandeze në fund të turneut të Francës, duke lënë vetëm Hallgrimsson të marrë frenat e saj.
