Të tjera detaje janë zbardhur në lidhje me vendosjen e tritolit një ditë më parë në banesën e 62-vjeçares.
Burime pranë prokurorisë së Shkodrës bëjnë me dije se një prej pistave kryesore ku është përqendruar organi i akuzës dhe policia vendore e Shkodrës lidhet me aktivitetin e djalit të 62-vjeçares, F.S.
Policia ka dyshime se kjo ngjarje ka të bëjë me përfshirjen e shtetasit D. S., djalit të saj në një kompani bastesh online.
Prokuroria dhe policia dyshojnë se D.S. është menaxheri i serverave të internetit të kompanisë së basteve. Pavarësisht kësaj piste hetimi personi në fjalë të cilit iu vendos tritol në derën e shtëpisë e ka mohuar një fakt të tillë duke thënë se puna e vetme është ajo në një kompani internet.
Po ashtu shtetasi D.S. ka deklaruar se nuk ka asnjë konflikt dhe nuk e ka idenë se kush mund të jenë autorët.
“E vetmja punë që bëj është ajo në një kompani internet dhe nuk kam lidhje me asgjë tjetër. Nuk e di se kush mund të jenë autorët pasi nuk kam asnjë konflikt dhe nuk e di arsyen e kësaj ngjarje”, ka deklaruar shtetasi, banesat e të cilit u sulmua me eksploziv.
Megjithatë policia dhe prokuroria e kanë si pistën më të mundshme përfshirjen e D.S. në kompaninë e basteve sportive dhe mendohet se ky sulm ndaj tij është një paralajmërim për të mos u marrë më me bastet online.
Ngjarja ndodhi rreth orës 3:40 të një dite më parë kur tritoli shpërtheu në derën e shtëpisë të familjes Sala.
Nga kamerat policia nuk ka arritur që ta identifikojë autorin deri më tani për shkak të skafandës që mbante në kokë.
62 vjeçarja F.S. e cila punon në doganën e Hanit të Hotit tek peshorja duke peshuar mallrat që hynë e dalin në atë doganë ka deklaruar se as ajo nuk ka konflikte me askend ndërsa për prokurorinë puna në doganë nuk qëndron si pistë hetimi sepse për pak muaj kjo shtetase del në pension.
Policia dhe prokuroria vijojnë hetimet për ta zbardhur të plotë këtë ngjarje të shpërthimit me tritol.
