Policia ka vënë në pranga një 38-vjeçar nga Mali i Zi, i cili ishte në kërkim ndërkombëtar.
Ai u kap në pikën kufitare të Hanit të Hotit, teksa po tentonte të hynte në Shqipëri.
38-vjeçari ishte shpallur në kërkim ndërkombëtar pasi autoritetet gjyqësore në Vjenë i kanë caktuar masën e sigurisë “Arrest në burg”, për veprat penale “Organizata kriminale” dhe “Vjedhja në rrethana rënduese”.
“Shërbimet e Policisë Kufitare të PKK Hani i Hotit, si rezultat i kontrolleve të shtuara dhe i shkëmbimit të informacionit me Interpol Tiranën, kanë kapur në hyrje të RSh-së, shtetasin malazez A. P., 38 vjeç, banues në Mal të Zi. Ky shtetas ishte shpallur në kërkim ndërkombëtar pasi autoritetet gjyqësore në Vjenë, Austri, më datë 08.05.2024, i kanë caktuar masën e sigurisë “Arrest në burg”, për veprat penale “Organizata kriminale” dhe “Vjedhja në rrethana rënduese””, njofton policia.
Interpol Tirana, në bashkëpunim me Interpol Vjenën, do të kryejë procedurat për ekstradimin e 38-vjeçarit, në Austri./Opinion.al
