Një ngjarje e pazakontë ka ndodhur në mëngjesin e së hënës së Pashkëve për ish-trajnerin e Kombëtares shqiptare, Christian Panucci.
Teksa ndodhej me pushime në Dubai së bashku me partneren e tij, makina e tij tip Audi është përfshirë nga flakët në oborrin e vilës së tij, mes zonave Fonte Laurentina dhe Spinaceto, në periferi të Romës.
Menjëherë pas njoftimit, forcat zjarrfikëse dhe karabinierët kanë ndërhyrë për të shuar flakët. Për fat të mirë, nuk ka pasur persona të lënduar, ndërsa zjarri është vënë nën kontroll në kohë.
Autoritetet kanë nisur hetimet për të zbardhur rrethanat e incidentit. Pamjet e kamerave të sigurisë brenda pronës së Panuccit janë marrë në shqyrtim, dhe një ndër pistat që po hetohet është edhe ajo e një akti të mundshëm të qëllimshëm.
I njoftuar me telefon për incidentin, Panucci ka shprehur shqetësimin e tij dhe ka kërkuar të kuptojë çfarë ka ndodhur realisht në mungesë të tij.
