Nga Ismail Çala
Një ish-operativ i sigurimit në qytetin tim sot është shef policie.
Ish operativi i sigurimit do që ta marrin e ta sjellin në shtëpi me makinë. E mira do ishte me Gaz 69, por meqënse tani Gaz 69 nuk ka, pranon edhe me Benz.
Ish-operativi i sigurimit i ka zgavrat e syve të thella, vetullat të zeza, hundën si kopan lëveresh, veshët si def, nofullat e gjëra, dhëmbët si kalldrëm, qafën si trung, flet me zë të trashë, ecën me hap të rëndë ushtarak, mban në dorë një cantë të zezë, përshëndet duke tundur kokën si atëhere, ndonjëherë e ngre grushtin lart.
Në mbledhje flet gjatë. Kërkon realizim të detyrave, tejkalim të planit të gjobave, i detyron vartësat të mbajnë shënime. Rri ulur në karrike dhe sytë i mban nga dera, sikur pret nga casti në cast të hyjë eprori ta gjejë duke zbatuar detyrën dhe tja hedhi krahët në qafë dhe tja rrahi shpatullat.
Ish operativi i sigurimit para pak vitesh ishte i papunë, rrinte gjithë kohën te një lokal i një mikut të tij të vjetër ish komandant burgu ku pinte fërrnet nga ai i vendit. Qeshte si idiot dhe askujt nuk i shkonte ndërmend se ky lloj shtaze mund të bëhej përsëri shef.
Ish operativi i sigurimit sot shef policie rri kapardisur me kollare, vesh kostum me vija të holla, mbath këpucë të shtrenjta, dy fëmijët i tymosin miell, gruan e ka rruspie, mban tre dashnore, nuk pi duhan me qese, por Marlboro. Thonë se mban lidhje të fshehta me kryeplakun e një fshati të thellë dhe disa trafikantë hashishi.
Ish-operativi i sigurimit të shumtën e kohës e kalon nëpër restorante të shtrenjta ku ha e pi si derr, bërtet e uluret, qesh me të madhe, krekoset si kërriç. Ka qef që të tjerët në tavolinë ta dëgjojnë, t’ju tregojë se sa i zoti është në punët e policisë, sidomos në rrahje deri në kalbje pa e vdekur të rrahurin.
E kuptoni pra pse shqiptarët kanë nisur të ikin rrugës duke folur me vete, nuk u shohin mirë sytë e nuk u dëgjojnë mirë veshët, janë gjithë kohës me temperaturë dhe ethe, i zë shpejt gripi, sherrosen kot me gruan, u bërtasin pa shkak fëmijëve, kur vjen mbrëmja ndjehen të mërzitur, në gjumë shohin ëndërra të liga?
