Mirosh Djaloshi, 54 vjeç, u gjet i pajetë mëngjesin e djeshëm nga familjarët dhe të afërmit e tij. Sipas Policisë së Durrësit, viktima ishte goditur disa herë me mjete të forta (çekiç) pas koke, çka i kishte shkaktuar atij vdekjen. Familjarët e tij kanë njoftuar menjëherë policinë sapo kanë konstatuar ngjarjen, ndërsa kanë nisur hetimet për të zbardhur krimin e rëndë dhe për të identifikuar autorin.
“Hetimet janë përqendruar në atë të një konflikti brenda familjes, i cili ka degjeneruar deri në dhunë fizike, duke e goditur me mjetë të forta, si pasojë e së cilës 54 vjeçari ka gjetur vdekjen e menjëhershme. Por nuk përjashtohen as pista të tjera, për të cilat po hetohet”, bëri të ditur Policia. Burime nga grupi hetimor thanë se nga të dhënat e deritanishme rezulton se kryefamiljari kishte pasur debat me familjarët pak orë para ngjarjes, për arsye ende të paqarta.
Mirosh Djaloshi njihej në zonë si person pa konflikte, por që e “shkelte” pak me alkoolin, çka mund të ketë ndezur debatin mes tij dhe anëtarëve të tjerë të familjes, e cila përbëhej nga pesë anëtarë, bashkëshortja, dy djem dhe një vajzë. Por, krahas kësaj, ekspertët po hetojnë edhe në atë të një konflikti mes personave të tjerë, pa përjashtuar këtu edhe vrasjen për shkak të një grabitjeje të mundshme.
Për të zbardhur ngjarjen, Policia ka shoqëruar për në komisarit të gjithë familjarët e viktimës, përfshirë bashkëshorten, fëmijët, por edhe kushërinjtë e tij më të afërt. Nëpërmjet dëshmisë së tyre, Policia shpreson të hedhë dritë mbi rrethanat e krimit, me qëllim identifikimin e autorit dhe vënien e tij përpara drejtësisë. 54vjeçari, Mirosh Djaloshi, mësohet se ishte pa punë, por ka mbajtur postin e kryeplakut të fshatit Shkallë për 17 vjet.
