TIRANE- “Ardhja e muxhahedinëve në vendin tonë është si problemi i armëve kimike. Shtetet e Bashkuara të Amerikës na kanë bërë aq shumë jo shërbime, por gjëra edhe më të mëdha kështu që ne kaq kemi mundësi t’u bëjmë për ta”, shprehet Fatos Klosi, ish-kru i Shërbimit Informativ në një intervistë për “Shekulli”-n.
Ai thekson se kurrsesi ardhja e tyre nuk mund të konsiderohet si problem për sa kohë që në vendin tonë ka tashmë një numër të madh muxhahedinësh të cilët nuk kanë krijuar asnjë lloj problemi. “Komente ka plot, por unë di grupin e parë që nuk ka krijuar asnjë shqetësim. Ata janë në qejfin e tyre madje na kanë dhënë neve mësim për mënyrën si e kanë organizuar jetën, si jetojnë paqësisht. Ata vijojnë të jenë këtu. Pse nuk pyesin çfarë bëjnë ata, sa të rrezikshëm kanë qenë por merren me këto zhurmat. Unë nuk shoh asnjë problem”, shprehet ai. Sa i përket numrit më të madh të muxhahedinëve që pritet të vijnë në Shqipëri, Klosi shton se : “Aq ishin edhe më parë, por nuk e shoh absolutisht si problem”. Edhe komentet e medieve të huaja për një rrezik të mundshëm, Klosi i konsideron vetëm si xhelozi.
“Mbase janë xhelozë që nuk i kanë çuar në këto vende”, shprehet ai. Pothuajse të gjitha mediat greke pasqyruan vizitën e Sekretarit Amerikan, Xhon Kerri, por të gjitha mbanin kryesisht tituj të tipit: “Shqipëria do të presë 2000 muxhahedinë nga Irani”, duke treguar në këtë mënyrë një farë shqetësimi.
Rreth 2 mijë anëtarë të organizatës së opozitës iraniane “Mojahedin-e-Khalq” pritet që të mbërrijnë në Shqipëri pasi qeveria shqiptare ka arritur një marrëveshje me amerikanët. Në maj të vitit 2013, qeveria “Berisha” strehoi 210 muxhahedinë, ndërsa kryeministri Edi Rama ka rënë dakord për të mirëpritur edhe 2.000 të tjerë, nga 2.800 që ndodhen në “Kampin liria” në Irak.
