Massimo Brambati, ish-futbollist i Torino dhe Bari, në një lidhje direkte me Instagram me gazetaren e Tuttosport, Giovanna Martini, ka zbuluar se portieri i kombëtares shqiptare, Thomas Strakosha, është me koronavirus, sikurse edhe mesfushori i Milan, Franck Kessie.
“Ka dy lojtarë, një nga Milani dhe një nga Lazio, të cilët janë pozitivë për koronavirus. Bardh e kaltri është Strakosha, për të cilin ata thonë se ka një dëmtim të kaviljes që nuk është e vërtetë, megjithatë, ai bëri një tampon dhe testoi pozitiv… Unë nuk di për Ibran, por Kessie i Milanit është pozitiv. Meqenëse ai udhëtoi nga Afrika së bashku me Gervinho, ata gjithashtu karantinuan Gervinhon.”- ka deklaruar Brambati.
Këto deklarata të tij duket se kanë prishur disi qetësinë e klubeve të cilat ai i akuzon se kanë shumë fuqi në media për të mbuluar lajme të tilla.
Dimitris Strakosha, vëllai i portierit shqiptar i është përgjigjur këtyre deklaratave në Instagram.
“Ju duhet të keni turp të përhapni gënjeshtra dhe, nëse nuk do të respektoja moshën tuaj, unë personalisht do t’ju padisja për shpifje”- shkruan ai.
Ende nuk ka një reagim zyrtar nga klubet italiane lidhur me rrëfimin e Brambatit. /Opinion.al
