Irani ka shtyrë marrjen e një vendimi për dërgimin e një ambasadori të ri në Suedi në shenjë proteste për djegien e një Kurani jashtë një xhamie në Stokholm, tha të dielën ministri i jashtëm iranian Hossein Amirabdollahian.
Një burrë grisi dhe dogji një Kuran jashtë xhamisë qendrore të Stokholmit të mërkurën, ditën e parë të festave të Kurban Bajramit.
Policia suedeze e akuzoi personin që dogji librin e shenjtë për agjitacion kundër një grupi etnik apo kombëtar.
Ministria e Jashtme e Iranit thirri të enjten të ngarkuarin me punë të Suedisë për të dënuar atë që tha se ishte një fyerje ndaj shenjtërive më të shenjta islame.
“Megjithëse procedurat administrative për emërimin e një ambasadori të ri në Suedi kanë përfunduar, procesi i dërgimit të tyre është pezulluar për shkak të lëshimit të një leje nga qeveria suedeze për përdhosjen e Kuranit të Shenjtë,” shkroi Amirabdollahian në Tëitter të dielën.
Ai nuk specifikoi se për sa kohë Irani do të përmbahet nga dërgimi i një ambasadori në Suedi. Ndërsa policia suedeze ka refuzuar disa aplikime të fundit për demonstrata kundër Kuranit, gjykatat i kanë anuluar ato vendime, duke thënë se ato cenojnë lirinë e fjalës./Opinion.al
