Presidenti i Iranit, Hassan Rohan ka thënë se sanksionet amerikane i kanë kushtuar Iranit 200 miliardë dollarë në dy vjetët e fundit.
“Irani do të mund të fitonte 200 miliardë euro shtesë nëse shteti nuk do të përfshihej në luftë ekonomike”, ka thënë ai teksa ka prezantuar një projekt hekurudhor afër Teheranit.
Rohani ka ngritur pikëpytje për deklaratat e konservatorëve të linjës së ashpër qe kritikojnë atë duke i thënë se sanksionet nuk kanë pasur ndikim mbi Iranin.
“Çfarë duhet të bëjmë? Kur nuk ka ushqim dhe ujë, ju jeni sërish në rrezik pavarësisht sa të fuqishëm jeni”, ka thënë ai.
Kujtojmë se Shtetet e Bashkuara kanë vendosur sanksione të reja kundër Iranit, pasi Uashingtoni ka braktisur marrëveshjen bërthamore që Irani ka nënshkruar me fuqitë botërore më 2015.
Marrëveshja parashikonte kufizim të aktivitetit bërthamor të Iranit në këmbim të lirimit nga sanksionet por prej ditës kur SHBA-ja është larguar nga kjo marrëveshje, Irani ka humbur 90 për qind të eksporteve të naftës, që konsiderohet burim kryesor i të ardhurave. Valutës iraniane i ka rënë vlerë dhe inflacioni ka tejkaluar shifrën 40 për qind./Opinion.al
