Irani ka ekzekutuar publikisht dy persona, të dënuar me vdekje pas një sulmi në një faltore shiite që vrau të paktën 13 persona në Tetor. Sulmin e mori përsipër Shteti Islamik (ISIS).
Dy burrat, të identifikuar si Mohammed Ramez Rashidi dhe Naeem Hashem Qatali, u varën në orët e para të së shtunës pasi Gjykata e Lartë konfirmoi dënimet e tyre.
Gjatë gjyqit, ata pranuan se kanë qenë në kontakt me shtetin Islamik në Afganistan dhe kanë ndihmuar në organizimin e sulmit.
Faltorja e Shah Cheragh në provincën e Fars, një nga faltoret më të rëndësishme në Islamin Shia, u sulmua më 26 tetor 2022.
Klipet nga kamerat e sigurisë të publikuara në atë kohë treguan një person të armatosur të vetëm që hynte në faltore me një pushkë automatike. Pasi hapi zjarr dhe mori rrugën për në kompleksin kryesor, ai qëlloi një grup pelegrinësh dhe stafin.
Autoritetet thanë se 13 persona u vranë dhe 40 u plagosën. Personi i armatosur, për të cilin zyrtarët thanë se ishte nga Taxhikistani, u vra pasi forcat e sigurisë ndërhynë.
