Parlamenti i Iranit votoi ditën e sotme për të pezulluar bashkëpunimin e vendit me Agjencinë Ndërkombëtare për Energjinë Bërthamore (IAEA).
Sipas CNN, vendimi i Asamblesë Konsultative Islamike të Iranit, e njohur ndryshe si Majles, duhet të marrë ende miratimin përfundimtar nga Këshilli Suprem i Sigurisë Kombëtare, i cili kryesohet nga Presidenti Masoud Pezeshkian.
Megjithatë, vendimet e Majles që kanë të bëjnë me çështje të politikës së jashtme shpesh kanë natyrë simbolike, për sa kohë nuk mbështeten nga organet më të fuqishme të emëruara nga Udhëheqësi Suprem Ali Khamenei.
Të dielën, Komisioni Parlamentar për Sigurinë Kombëtare dhe Politikën e Jashtme propozoi mbylljen e ngushticës së Hormuzit, një zonë strategjike në bregun jugor të Iranit.
Edhe ky vendim, nëse ndërmerret, do të kërkojë miratim nga Këshilli Suprem i Sigurisë Kombëtare.
Agjencia Ndërkombëtare për Energjinë Bërthamore bëri thirrje për rifillimin e bashkëpunimit me Iranin, i cili u ndërpre pas sulmeve izraelite të paprecedentë mbi objektet bërthamore iraniane që nisën më 13 qershor.
Të martën, IAEA publikoi një deklaratë duke përshëndetur përfundimin e konfliktit 12-ditor dhe duke konfirmuar gatishmërinë për të rifilluar punën në terren.
“Inspektorët e IAEA-së kanë qëndruar në Iran gjatë gjithë konfliktit dhe janë të gatshëm të kthehen në objektet bërthamore dhe të verifikojnë sasinë e materialit bërthamor, përfshirë mbi 400 kg uranium të pasuruar në nivelin 60%, të cilin e verifikuan për herë të fundit vetëm pak ditë përpara fillimit të sulmeve ajrore nga Izraeli,” thuhet në deklaratë.
