Sot është Dita e Verës dhe si një ditë e tillë të gjitha bashkitë bëjnë organizimet e tyre përkatëse, për ta festuar sa më këndshëm këtë ditë të shënuar.
Deri këtu nuk ka asgjë shqetësuese. As kur vjen fjala për shpenzimet që kjo ditë meriton. Por shqetësuese mund të bëhet kur shpenzimet për këtë ditë bëhen në mënyre jo transparente dhe pa prokurorim.
Siç është rasti i Bashkisë Tiranë, ku nga një investigimi i shpejtë rezulton në Buletinët e Prokurimeve Publike, mund të gjesh prokurime të ndryshme nga Bashkia Tiranë por nuk gjen asnjë prokurim sa i takon zbukurimit të qytetit në raste festash, ndonëse qyteti është zbukuruar në këto ditë.
Gjatë investigimit të kryer zbuluam se Bashkia Tiranë i ka akorduar kompanisë me emrin “Gjenerata e Re” (NIPT J61826053A), një shumë prej 7,837,600 lekë sa i takon zbukurimeve për Ditën e Verës. Megjithëse kompania ka një NIPT ajo, sipas asaj çfarë lexojmë në QKR, ende nuk ka dorëzuar dokumentacionin e duhur dhe njëkohësisht ende nuk ka një ekstrat të sajin historik.
Ndonëse, sipas të dhënave të publikuar nga Spending Data, kjo kompani ka fituar përmes dy projekteve dy tendera me vlera tepër të larta
(http://spending.data.al/en/treasury/list/year/2015/inst_code/2101001/perf_id/GJENERATAERE)
Gjenerata e re është një Shoqëri me Përgjegjësi të Kufizuar (https://opencorporates.com/companies/al/J61826053A)
e cila ka fituar në një hark të shkurtër kohor 9,327,200 lekë nga Bashkia Tiranë. Mënyra e fitimit të këtyre parave është përmes projekteve që Bashkia Tiranë ia ka shpallur fituese kësaj kompanie.
Vlen për t’u theksuar se Bashkia Tiranë edhe në mandatin e kryebashkiakut të mëparshëm, ka nënshkruar transaksione të tilla mbi projekte por asnjëherë këto shifra nuk kanë qenë kaq të larta sa rasti në fjalë.
Hijet e dyshimit bëhen edhe më të shumtua kur sheh edhe lëvizjet për miratimin me urgjencë të Rregullores së Projekteve Artistike sa i takon bashkisë Tiranë.
Aq më tepër kur fitues të projekteve është një kompani deri më tani fantazmë, në arkat e së cilës Bashkia ka dërguar shumë e rreth 7.8 mln lekëve pa asnjë sqarim për procedurën e ndjekur në shpalljen fitues të këtij projekti si dhe për përfituesit e tij. (http://tirana.al/publikime/)
