Pronari i anijes së rrëmbyer, Flori Çelepia (në emër të tij është anija), ka hedhur poshtë pretendimet e marinarit egjiptian se ka disa rroga pa u paguar. Sipas tij, marinari është paguar rregullisht, madje edhe më tepër sesa meritonte.
Ai i bën thirrje shtetit të ndërhyjë, ndërsa pohon se egjiptiani ka qëllim ta përdorë anijen për klandestinë.
Flori, çfarë ka ndodhur me anijen “Çelepia 2”?
E nisëm nga ora 2 e drekës në datën 18 qershor, me rregull dhe me çdo gjë. Anija doli normalisht në det për të kryer aktivitetin e përditshëm. Iu thamë të na kontaktojnë kur të nxjerrin rrjetën, çfarë keni kapur, çfarë s’keni kapur. Ndërkohë që ata nuk kontaktuan, u bë dita e dytë në radio nuk përgjigjeshin dhe kështu me radhë. Sot (dje) morëm një njoftim që barka është në Egjipt.
Pse përfundoi barka e peshkimit në Egjipt?
Marinari që kishim punësuar ka marrë peng anijen dhe ekuipazhin e ka udhëtuar drejt Egjiptit. Fillimisht nuk kishim kontakte dhe u trembëm për jetën e marinarëve që ndodheshin në bord, përfshirë edhe Salam, pasi dyshonim se mos u kishte ndodhur gjë në det, sepse ka pasur det këto ditë. Kur sot (dje) marinari egjiptian na kontaktoi dhe na tha se anijen e kishte marrë peng së bashku me dy personat që ndodheshin me të, ku për ta kthyer kërkon 70 mijë euro.
A është e vërtetë që ju nuk e keni paguar? Pse veproi ai kështu?
Nuk di të them se përse ka vepruar në këtë mënyrë, por ai thotë se do ta përdorë anijen për të transportuar klandestinë. Edhe kur kontaktoi me mua, më bëri presion se do t’i mbyste dy marinarët dhe anijen, ndërsa më dërgoi foto të njërit prej marinarëve, të cilin e mbante të lidhur me zinxhirë. Ai është paguar rregullisht për punën që ka kryer, madje e kemi paguar edhe më tepër, kur kemi dalë mirë me peshkim. Ai me ne ka qenë shumë ikënaqur, madje i kemi dhënë edhe shtesë.
Keni kontaktuar me dy marinarët e tjerë?
Jo, nuk kemi kontaktuar dhe jemi shumë në ankth, pasi dyshojmë mos u ka ndodhur ndonjë gjë. Ai solli vetëm fotot, për të na treguar se nuk bënte shaka. Jemi shumë në merak për ekuipazhin dhe kërkojmë ndërhyrjen e shtetit për t’i kthyer ata shëndoshë e mirë në shtëpi, pastaj anija është çështje tjetër. Ne kërkojmë nga shteti të na sjellë marinarët gjallë, se janë dy prindër që kanë lënë familjen. Nuk i kemi asnjë borxh, por edhe në lidhje me lekët do t’i përgjigjemi por s’dimë se si t’i përgjigjemi dhe duhet të na ndihmojë shteti./ Leonidha Musaj Panorama.al
