Prokurori Federal i Belgjikës, z.Frederic Van Leeuw ka dhënë një intervistë për drejtuesin e emisionit Opinion, Blendi Fevziu në lidhje me krimin e organizuar dhe disa çështje me shumë interes për Shqipërinë dhe Belgjikën.
Leeuw ka folur gjatë në detaje për disa nga çështjet më serioze të raporteve mes dy vendeve në lidhje me krimin e organizuar dhe për disa nga personazhet e përfshira në këto ngjarje.
Përgjatë intervistës, ai është ndalur edhe në rastin e deputetit Mark Frroku.
Sipas tij, Frroku është në Shqipëri dhe Shqipëria nuk ekstradon shtetasit e saj.
Si më poshtë vijon intervista e dhënë në Opinion:
Z.Van Leeuw, mirë se erdhët në Shqipëri dhe mirë se erdhët në TV Klan.
Faleminderit, mirëdita.
Kjo është hera e tretë që ju vini në Shqipëri. Përse Prokurori Federal i Belgjikës vjen kaq shpesh në Shqipëri?
Sepse ne kemi raporte shumë të mira me Prokurorin e Përgjithshëm të Shqipërisë, dhe shumë punë, kemi vendosur gjithashtu para disa vitesh një protokoll me Prokurorin e Përgjithshëm të Shqipërisë për të lehtësuar këmbimin e informacionit, si edhe zgjidhjen e çështjeve që lidhen me krimin, terrorizmin dhe të tjera. Në kuadër të këtij protokolli takohemi rregullisht, qoftë në Shqipëri apo në Belgjikë.
Cilat janë pikat më të rëndësishme të këtij bashkëpunimi mes Shqipërisë dhe Belgjikës?
Përsa i përket gjyqësorit punojmë shumë mbi çështjet e krimit të organizuar, por kjo prek gjithashtu të gjitha çështjet penale që lidhin Shqipërinë me Belgjikën. Në çdo mbledhje marrim të gjitha çështjet që janë në shqyrtim madje edhe në prokuroritë lokale dhe përpiqemi të gjejmë mënyra për të përsosur bashkëpunimin ndërkombëtar.
Flitet për krimin e organizuar shqiptar në Belgjikë apo edhe për krimin e organizuar belg në Shqipëri.
Kjo mund t’i prekë të dyja. Ndodh që të kemi edhe kërkesa për hetim nga Shqipëria për krimin e organizuar në Belgjikë.
Gjithmonë dëgjojmë për krimin e organizuar shqiptar në Belgjikë, por nuk kemi dëgjuar asnjëherë për krimin belg në Shqipëri.
Mund të ketë hetime, por për momentin nuk kam të dhëna për krimin e organizuar belg në Shqipëri. Mund të ketë kërkesa për të ndihmuar hetimin në Shqipëri dhe ka ndodhur.
Cilat janë çështjet më të rëndësishme që ju keni me Prokurorin e Përgjithshëm të Shqipërisë.
Është e vështirë të thuhet, sepse kemi patur raste shumë të rëndësishme me mandate arresti europiane, më falni, procedura që janë ekzekutuar shumë , sepse kur njerëzit njihen, kemi sisteme të ndryshme dhe secili vend ka strukturën e vet juridike, ndaj kur njerëzit njihen dhe institucionet gjithashtu, mund të veprohet më shpejt dhe në interes të një drejtësie, mendoj se kjo është e rëndësishme.
Keni një bashkëpunim të mirë?
Po, kemi bashkëpunuar shumë mirë, njerëzit njihen dhe institucionet po ashtu, kjo bën që t’i shpjegojnë njëri-tjetrit ku qëndrojnë vështirësitë e procedurave që dalin gjatë punës dhe ky bashkëpunim bën të mundur që të kapërcehen disa pengesa.Pra ky protokoll bashkëpunimi është një formulë shumë e mirë.
Z. Van Leeuw, në Shqipëri është shumë e njohur çështja e z.Mark Frroku, nuk e di nëse ju e njihni, sepse në Belgjikë ka përdorur identitet tjetër, është një anëtar i krimit të organizuar shqiptar dhe është zgjedhur edhe deputet në Parlamentin e Shqipërisë. Cila është çështja e Mark Frrokut në Belgjikë dhe në Shqipëri.
Në Belgjikë, Mark Frroku ka qenë objekti i një procedure që është ende në hetim.
Nuk është mbyllur ende?
-Jo.
Sepse në media është thënë se çështja është mbyllur në Belgjikë.
Ka patur një procedim në Gjykatën Penale, një dënim, por Gjykata e Lartë për arsye procedurale ka shfuqizuar këtë masë dënimi dhe çështja nuk është mbyllur ende në Belgjikë. Por në të njëjtën kohë, po zhvillohet edhe një hetim në Shqipëri dhe për momentin po presim të shohim se çfarë do të dalë nga ky hetim në Shqipëri.
Ai ka kryer një krim në Belgjikë në 1999. Pse çështja e Frrokut është në Shqipëri dhe duhet të gjykohet këtu?
Problemi është se z.Frroku është në Shqipëri dhe Shqipëria nuk ekstradon shtetasit e saj. Ajo që më intereson mua, është që drejtësia të vihet në vend dhe dua të shtoj se z.Frroku është shqiptar, viktima është shqiptar, gjithçka ndodhi në një rreth shqiptar, ndaj mendoj se vendi më i mirë për t’u gjykuar është këtu. Mbi të gjitha z.Frroku është këtu dhe do të ishte shumë e ndërlikuar për ne që ta merrnin nga një shtet që nuk i ekstradon shtetasit e tij. Mendoj se është e rëndësishme që në kuadër të drejtësisë, drejtësia të bëhet dhe ku duhet të mbrohet z.Frroku për akuzat e ngritura ndaj tij.
Por avokati i z.Frroku u shpreh nga Brukseli se akuzat në Shqipëri janë më të rënda se ato në Belgjikë.
Këtë, unë nuk e di. Nuk jemi konkurrentë. Ligjet ndryshojnë. Mendoj se është e rëndësishme që kjo çështje të gjykohet dhe do të shohim se çfarë do të vendosë Gjykata. Mendoj se duke i shkuar më thellë kësaj çështjeje, mendoj se ai ka të drejtë të mbrohet.
I keni sjellë këtu të gjitha dokumentet e rastit Frroku?
Ka patur këmbim informacioni ndërmjet Belgjikës dhe autoriteteve gjyqësore shqiptare përsa i përket dokumentacionit. Kjo është një çështje që u trajtua në Prokurorinë e Përgjithshme të Brukselit, Prokuroria Federale është përgjegjëse për lehtësimin e procedurave për bashkëpunimin ndërkombëtar dhe në këtë kuadër kemi ndihmuar me kontaktet që kishim sipas këtij protokolli. Kemi ndihmuar që këto dokumente, që letërporositë të ekzekutoheshin. Kemi marrë një letërporosie shqiptare që është ekzekutuar në Belgjikë.
A jeni surprizuar kur dëgjuat që një pjesëtar i krimit të organizuar, një vrasës ishte zgjedhur deputet në Parlamentin e Shqipërisë?
Në profesionin tim has shumë surpriza. Dua të them se nuk mund ta dish para se të ndodhë. Mendoj se, është e rëndësishme tani që ky rast të mund të gjykohet këtu, sepse këtu ka nisur hetimi dhe nuk mund të them asgjë më shumë, sepse çdo person ka të drejtë të mbrohet dhe jo të dënohet në nxitim e sipër.
Është akuzuar vetëm për vrasjen e bashkëkombasit të tij Aleksandrit, nuk më kujtohet mbiemri i tij, apo edhe për krimin e organizuar, prostitucion…
Në Belgjikë ka dalë para Gjykatës Penale për vrasjen dhe nuk dua t’i futem detajeve, sepse mendoj se është e rëndësishme të respektohen të drejtat e gjithkujt. Duhet respektuar hetimi që ka nisur ndaj tij.
Z.Van Leeuw, cilat janë karakteristikat e krimit të organizuar shqiptar në Belgjikë?Ku janë më të angazhuar?
Tek ne thuhet shpesh polikrimi i organizuar, pra bëjnë pak nga të gjitha. Shpeshherë është mjaft e komplikuar të luftosh këtë lloj fenomeni, sepse kemi të bëjmë me trafik armësh, veprime të dhunshme, trafikimin e qenieve njerëzore…
Bëhet fjalë për shqiptarët e Shqipërisë apo me termin shqiptar ju përfshini edhe ata shqiptarë të krimit të organizuar të Kosovës?
Nuk dua aspak të stigmatizoj njërin apo tjetrin popull. Ka edhe lidhje mes vendeve, në Belgjikë nuk janë vetëm rrjetet e shqiptarëve, por mendoj se duke ndërtuar këto mjete bashkëpunimi, e kemi më të lehtë të luftojmë këtë fenomen.
Ku janë më të pranishëm, tek prostitucioni…?
Pothuajse tek të gjitha, kriminaliteti nuk është i njëjtë me atë të mëparshmin, ka evolucion edhe këtu. Ka shumë qytetarë me origjinë shqiptare që jetojnë në Belgjikë dhe nuk kanë asnjë lidhje me krimin dhe është e rëndësishme ta theksojmë këtë.
Ju përmendët edhe trafikun e armëve.
-Po.
Kemi patur shumë reportazhe në media ku thuhej se armët e përdorura në atentatet e Parisit dhe të Brukselit, kanë ardhur nga Ballkani, mbase nga Shqipëria.
Trafiku i armëve është një problem europian. Sepse ka zona që kanë ende armë…
Që janë përdorur për terrorizmin?
Që janë përdorur nga terroristët apo nga krimi i organizuar. Problemi që kemi hasur në atentatin e Brukselit apo në Paris, është se ne kemi rrjete të krimit të organizuar që bashkëpunojnë me terrorizmin dhe i kanë mbështetur në logjistike, me mjete dhe me burimet e tyre. Pra, në rastin e armëve një problem tjetër që e hasim tani në rang europian është se ka shumë zona, ku ka shumë armë dhe mund të merren lehtë. Disa vende i prodhojnë disa lloje armësh dhe nuk kemi standarde të përbashkëta të demilitarizimit. Kjo do të thotë se armët janë mbledhur në disa vende dhe janë shitur ilegalisht në internet. Eshtë e lehtë në disa vende të krijohen armë të dëmshme, ky është problemi më i madh për momentin dhe kërkon një zgjidhje europiane.
Po problemi më i madh për ju në Belgjikë, cili është? Terrorizmi?
Aktualisht jam i zënë me problemin e terrorizmit. Kjo është e qartë. Siç jua thashë, lidhja me krimin e organizuar është mjaft e fortë.
Është më shumë ndërkombëtar?
-Po. Kemi të bëjmë me njerëz, të rinj që vijnë tek ne dhe kryejnë këto atentate, disa prej tyre pasi kanë ndenjur pak kohë në Siri, por ajo që është ndërkombëtare, është se konstatojmë që këta njerëz para se të kryejnë atentatet në Paris dhe Bruksel, kanë përshkuar gjithë Evropën për t’u strehuar një muaj apo dy në Bruksel. Mund të kenë ndenjur kudo, në Francë, në Gjermani.
Si është e mundur, si e shpjegoni që këto grupet e vogla terroriste janë vendosur në Bruksel?
Këtu jemi përballur me njerëz që vijnë nga Belgjika që janë ngatërruar me njerëz frankofonë dhe kanë luftuar së bashku në Siri, është normale që kur kthehen kanë rrjetet e tyre në vend, kanë rrethin e tyre familjar, shoqëror.
Keni patur informacione më parë për aktivitetet e këtyre grupeve?
Kemi disa vjet që ndjekim një numër të konsiderueshëm personash, pasi në Belgjikë ka shumë të ardhur nga vende të ndryshme, por është shumë e ndërlikuar të hetosh mbi këtë problematikë. Nuk kryen asnjë shkelje ligji ai që ikën në Siri apo në zonat përreth, Turqi, Liban. Duhen prova që këta persona kanë shkuar atje për t’u bashkuar me grupet terrorist apo kanë kryer ndonjë shkelje. Përsa i përket hetimeve, përpiqemi të ndjekim një grup personash që kanë qenë atje, që rikthehen, persona që janë radikalizuar apo që janë në proces radikalizmi dhe e gjithë kjo kërkon një grumbullim informacioni.
Pse grupi terrorist i Brukselit apo i krijuar në Bruksel kreu atentate terroriste në Paris?
Shpresoj që këtë të na e shpjegojnë. Mendoj se përpiqen të prekin simbole.
Sipas disa deklaratave nuk është më mister që kanë lidhje me bombardimet në Siri dhe kjo është mënyra e tyre për të goditur, për kundërsulm. Pra, ka lidhje me luftën në Siri. Ju na bombardoni në Siri, ndaj ne ju godasim. Risia e këtij fenomeni është se po shohim komandantë të vërtetë, nuk është më një grup i vogël terroristësh prej 4 apo 5 personash. Janë dhjetëra persona me një sistem logjistik, kanë makina, dhjetëra shtëpi të marra me qira, kalojnë nga një shtëpi në tjetrën. Janë më operativë.
Cilat janë lidhjet që kanë me popullin që i rrethon, me fqinjët. Historia e Molenbekut?
Molenbeku nuk është një lagje e vogël, ka thuajse 100 mijë banorë. Është e vërtetë që hetojmë shumë persona që vijnë nga ajo lagje, por nuk janë 100 mijë të këqinj, nuk është i gjithë Molenbeku terrorist. Por këta persona kur rikthehen në Belgjikë, sidomos kur u duhet të fshihen, mbështeten tek familjarët, tek miqtë e tyre, këtë kemi mundur të konstatojmë.
Z.Frederic Van Leeuw, është interesant fakti që anëtarët e grupeve terroriste nuk janë nga gjenerata e parë e emigrantëve, nuk janë njerëz që janë larguar nga Siria, Afrika e Veriut apo vende të tjera, janë persona që vijnë nga gjenerata e tretë apo e katërt. Përse Europa nuk ka mundur të integrojë gjeneratën e tretë apo të katërt të këtyre emigrantëve, dua të them fëmijët e emigrantëve?
Mendoj se ka shumë prej tyre që janë integruar në gjirin e Europës, por sipas informacioneve, kamikazët e Brukselit dhe të Parisit vijnë nga Siria. Ka një përzierje, pamë se në atentatet e Brukselit ishte edhe një suedez. një pyetje që secili prej nesh duhet ta bëjë nëse kemi të bëjmë me njerëz që nuk e njohin mirë islamin, por që ndodhen në një situatë, ku përfshihen në krimin e organizuar. Në një moment të caktuar u duket se ardhmja është mjaft e vështirë, nuk ecet përpara dhe vendosin se jeta nuk ka më vlerë dhe pranojnë të hidhen në erë.
Kemi shumë punë për të bërë në periferi me të rinjtë për të luftuar kundër këtij mesazhi, sepse jeta është e çmuar. Ka plot mënyra për të ecur përpara dhe në shoqëritë ka shumë mundësi për të jetuar.
Është e vërtetë që një prej anëtarëve të grupit terrorist të Brukselit, ka qenë i ndalur në Turqi dhe i ekstraduar në Belgjikë?
Eshte e vërtetë, ai është shoqëruar në avion nga autoritet turke, dhe ne na është thënë se ai ishte në avion. Pa shpjeguar që ai ishte një person shumë i rrezikshëm?
Nga informacionet që erdhën, pra sapo e thashë që fakti që ka udhëtuar në Turqi, nëse nuk ke informacione të tjera, jo domosdoshmërisht është shkelje, është e vështirë ta hetosh një rast të tillë penalisht.
Nuk mund të hapësh një çështje penale nëse një person ka shkuar në Siri dhe ka takuar një grup të caktuar pa pasur prova që është terrorist. Nuk hapet çështje pa pasur indicie.
Në Europë duhet të vazhdohet të luftohet kundër krimit me mjete ligjore, kjo është forca e demokracisë.
Keni informacione se shqiptarët janë të përfshirë në grupet terroriste që veprojnë në Europë?
Kemi mbledhur shumë informacione për këtë fenomen, nuk dua të ndaloj këtu, por dua të them se … Po bashkëpunime me terroristët e Evropës perëndimore dhe Shqipërisë?
Ka informacione që lidhen me krimin e organizuar dhe që në momentin që ke në dorë këto informacione, ndiqen në rrugë ligjore. Nëse unë kam në dorë çështje gjyqësore sipas informacioneve që vijnë për të gjitha vendet, dhe nga ato të Ballkanit, ku ka shumë probleme, por nuk mund të hyj në detaje. Ka dy probleme aktuale në Europë, mundësia e bashkëpunimit të grupeve terroriste me mafian. Dua të them që mafia ka të gjitha mjetet që mund t’i vërë në dispozicion të terroristëve dhe këta të fundit kanë paratë dhe motivacionin për të kryer akte terroriste.
A keni informacione mbi këtë bashkëpunim të mundshëm të mafias tradicionale europiane dhe këtyre grupeve terroriste? Në parim?
Eshtë pikërisht ajo që të gjithë i druhen. Kemi mundur të analizojmë atentatet e Parisit dhe të Brukselit dhe grupet që fshihen pas tyre. Pikërisht për këtë dyshohet të ketë lidhje përsa i përket anës financiare, pasi është e vështirë ta ndjekësh. Nuk ka të bëjë vetëm me paratë që vijnë nga Siria, por edhe nga krimi i organizuar apo sulmet me armë. Kjo problematikë është mjaft e komplikuar dhe mjaft e re për të gjitha shërbimet europiane. Eshtë një fenomen i ri dhe kemi përpara sfida të reja për të kapur këtë taktikë të re të këtyre komandantëve që përdorin strategji dhe rrjetet e krimit të organizuar për t’u financuar dhe për t’u armatosur. Madje edhe për t’u fshehur.
Problemi i numrit të madh të emigrantëve që vijnë nga Siria, edhe nga Afganistani,
Eshtë e mundur, a ekziston rreziku që mafia apo krimi i organizuar të përfitojë nga emigrantët apo të organizojnë trafikun e emigrantëve nga Lindja drejt Europës?
Problemi i emigrantëve qëndron, por ata vetë e kanë një problem sepse vijnë të gjejnë të ardhmen tek ne dhe duhet të jemi mjaft të vëmendshëm.
Sepse largohen nga një vend ku ka luftë.
Largohen nga vendi i tyre ku ka luftë dhe të rinjtë janë të detyruar të zgjedhin të jetojnë në kamp dhe më pas, për mendimin tim do të kemi të bëjmë me një problematikë të drejtave të njeriut në nivel ndërkombëtar.
Eshte një çeshtje shumë e ndërlikuar. Ajo që ne kemi mundur të konstatojmë është se ka patur probleme përsa i përket kontrollit të këtyre personave që vijnë.
Disa prej kamikazëve të Brukselit dhe Parisit kanë qenë të sinjalizuar si persona të rrezikshëm dhe ka patur mandat arresti për ta, megjithatë kanë mundur t’i kapërcejnë të gjithë kufijtë. Kanë mundur të hyjnë në zemër të Europës dhe ky është një problem i madh.
A keni frikë se mes emigrantëve mund të ketë shumë terroristë apo grupe të organizuara terroristësh?
Kemi informacione që duhen verifikuar, por mendoj se shërbimet e informimit punojnë shumë dhe
mbi të gjitha duhet të jemi mikpritës në raport me këto drama që ndodhin në vendin e tyre dhe të jemi të vëmendshëm sepse mekanizmat që ishin dikur dhe ato që janë e ushqejnë krimin e organizuar për shkak të gjendjes së mjeruar në të cilën ndodhen këta emigrantë. Duke paguar kalimin e tyre në Europë e ushqejnë krimin e organizuar. Prandaj dua të them që disa vende duhet të fillojnë të mendojnë për procedura apo të rregullojnë statutin e refugjatit që në vendin e origjinës që të vijnë në një mënyrë më pak traumatizuese dhe më pak të rrezikshme.
Kështu do të bëjnë të mundur që krimi i organizuar të mos ushqehet nga dëshpërimi i tyre.
Para se të emëroheshit Prokuror Federal i Belgjikës, keni punuar me krimin kibernetik. Eshtë një krim i ri që në Shqipëri është i panjohur. Ç’do të thotë kjo?
Kemi të bëjmë me një botë që është rritur me një shpejtësi të jashtëzakonshme.
Me zhvillimin e teknologjisë është normale.
Po, brenda 15 viteve kemi ndryshuar mënyrën e komunikimit në nivel botëror.
Që prej vitit 2006-2007 të gjithë shëtisin me iphone apo smartphone në dorë. 20 vjet më parë ky lloj krimi ishte i panjohur për Europën. Nëpërmjet këtyre mënyrave të reja të komunikimit, një person ka mundësinë të dëmtojë një person tjetër shumë larg, pa qenë nevojë të ketë kontakt me të. Përball këtij globalizimi që është pozitiv përsa i përket komunikimit, një person apo një grup kriminal gjen mënyrën dhe rastin për fituar para apo të ketë qëllime të tjera.
Eshtë një krim që nuk njihej dikur.
Po është një krim që është rritur në vitet e fundit dhe veçanërisht në fillim të shekullit të ri dhe sidomos tani. Eshtë mjaft i rrezikshëm sepse falë kompjuterëve apo këtyre mënyrave të komunikimit siguria nuk është në nivelet më të larta për të luftuar këtë krim. Mungon infrastruktura për të kontrolluar këtë territor.
Gazetari i BBC-së dhe autori i një libri mbi krimin kibernetik më ka thënë se mafia e krimit kibernetik po bëhet gjithnjë e më e fortë dhe më pranishme se mafia tradicionale.
Po, ka sfida të reja, pasi kemi të bëjmë me shumë para, sepse për ta nuk është e nevojshme që të kryejnë vjedhje për të fituar shumë para.
Ka patur raste që me shuma të vogla 2 apo 3 euro apo 10 euro nëpërmjet internetit të fitojnë miliona dollarë. Sepse infektojnë miliona kompjutera në të njëjtën kohë.
Kjo është një sfidë e madhe sepse kemi të bëjmë me para të pista që investohet nga kriminelë. Kjo vë në pikëpyetje edhe kufijtë e shteteve.
Sikurse e thashë në fillim që kemi sisteme të ndryshme dhe lind nevoja e bashkëpunimit, e vënies së kontakteve, etj, bashkëpunimi gjyqësor mbetet mjaft i ngadaltë krahasuar me këtë krim që vetëm rritet, sepse fare lehtë mund të zhvendosim një faqe interneti nga Belgjika ta çojmë në Bahamas apo në Tiranë. Nga kjo lind nevoja që shtetet të bashkëpunojnë me njëra-tjetrën gjithmonë e më shumë dhe më shpejt.
Vendet më pak të zhvilluara, si Shqipëria apo ato të Ballkanit a janë të përgatitura për këtë lloj krimi?
Nuk e di, nuk mund të flas për Shqipërinë. Në Belgjikë, mendoj se ekspertët bëjnë trajnime në vendet e ndryshme, sepse është një sfidë e madhe edhe për ne, për Belgjikën që duhet të përgatitë dhe të ketë gjyqtarë, policë më të specializuar për t’i bërë ballë këtij kërcënimi dhe t’i kushtojnë më shumë vëmendje trajtimit të krimit kibernetik. Është një sfidë për të gjitha vendet, pavarësisht shkallës së zhvillimit që kanë.
Edhe Shqipëria duhet të përgatitet për t’i bërë ballë krimit kibernetik, sepse të gjitha infrastrukturat sikurse tek ne do të kenë të bëjnë me kompjuterat.
Ju folët për paratë në të zezë, kam dëgjuar në media që ka patur shumë transferta të parave në të zezë nga Brukseli në Shqipëri.
Eshtë e mundur. Me evoluimin e informatikës, po asistojmë në evoluiminin e dimensionit të katërt. Kemi para që nuk menaxhohen nga bankat qendrore që lejojnë evazionin fiskal. Ka 2 miliard që kanë dalë në qarkullim nga “Bit Coins”.
Ka një seri të tërë monedha virtuale, banka virtuale, ekonomi virtuale, është ajo që ne e quajmë “Dark net”, pjesa e errët e Internetit që nuk e shohim.
Kjo është një ekonomi paralele, njëfarë dimensioni i katërt. Nuk kemi kritere territoriale.
Këto paraqesin sfida të reja për të gjitha shtetet.
Pyetja e fundit. Eshtë publikuar në të gjitha mediat historia e “Panama papers”, është e vështirë të thuhet nëse është legale, ilegale, diçka normale. Çfarë dini ju për këtë histori? Apo mbi parajsat fiskale në përgjithësi.
Mendoj se problematika qëndron tek konkurrenca fiskale mes shteteve. Ekziston një konkurrencë e madhe fiskale dhe mendoj se është diçka, për të cilën duhet të luftojmë së bashku. Përderisa secili duhet të zgjidhë për veten, unë jam idealist dhe mendoj se një ditë do të ndërgjegjësohemi dhe do të përballemi me këtë lloj problematike. Edhe një herë kemi një problematikë tjetër, dhe mbrojtja e jetës private është një shprehje e lartë e demokracisë. Nganjëherë e përdorim këtë “mbrojtjen e privatësisë” për të penguar disa autoritete gjyqësore për të hetuar. Pra, e lëmë mbrojtjen e jetës private në duart e privatëve, te bankat, tek aktorët e internetit. Qëllimi i një shoqërie tregtare është të bëjë para. Mendoj se ka vend për reflektim dhe ka diskutime…
Por flitet për paratë e politikanëve të vendeve demokratike që kanë investuar paratë e tyre në këto vende me parajsa fiskale dhe vendet e Europës perëndimore.
Problemi i pastrimit të parave lidhet me disa legjislacione që nuk përshtaten, në këtë rast informacionet kanë dalë nga gazetarët dhe në Belgjikë, Ministri i Financave i kërkoi gazetarëve që t’ia jepnin informacionin. Kjo është e pamundur, pasi gazetarët duhet të mbrojnë burimin e tyre.
Mbetet të shohim mbi ç’baza do të nisin hetimet, por është e qartë se do të ketë hetime në nivelin fiskal në shumë shtete të Europës. CNN tha se historia e “Panama Papers” do të ndryshojë jetën e biznesit ndërkombëtar. Ndoshta, nuk e di.
Ju falenderoj që ishit në studion e TV Klan dhe në atë të Opinionit.
