Intervista e Kryetarit të Kuvendit, z. Ilir Meta për emisionin “Opinion” të gazetarit Blendi Fevziu
Duket se reforma në drejtësi ka qenë kryefjala. Sot pasdite, ju jeni takuar në zyrat e Kuvendit të Shqipërisë së bashku me kreun e Partisë Socialiste dhe me kreun e Partisë Demokratike dhe keni mandatuar tre ekspertë, të cilët janë duke punuar edhe në këto momente. Sipas informacioneve që kam unë, duket se diskutimet po shkojnë mirë. Kjo do të thotë se keni rënë dakord në parim që të kalojë apo të mos kalojë reforma në drejtësi?
Besoj se reforma në drejtësi do të kalojë dhe angazhimi im ka qenë dhe do të mbetet deri në fund që kjo reformë të kalojë me konsensus…
Kjo reformë do të kalojë me bindje, apo është një përfundim që vjen nga bisedimet e sotme?
Së pari, këtë e kam pasur një bindje prej kohësh. M’u lëkund pak javë më parë, por pas takimit të sotëm me Kryeministrin Rama dhe me kryetarin e opozitës, zotin Basha, jam shumë i bindur se jemi shumë pranë konsensusit për reformën në drejtësi.
Thatë që iu është rikthyer bindja që reforma në drejtësi do të kalojë pas takimit të sotëm. Duhet të përzinit z. Lu dhe znj. Vlahutin që të arrinit në përfundimin se reforma do të kalojë, se, për sa kohë, ishin ata në takime nuk kalonte? Do të kalojë drafti hibrid, i propozuar nga ndërkombëtarët apo ndonjë draft që është rakorduar ndërmjet jush, z. Rama dhe z. Basha?
Jo, drafti që është diskutuar është ai hibrid dhe unë besoj se ai draft, bazuar edhe në qëndrimet publike të zonjës Nuland dhe qëndrimet e sotme publike të zotit Flekenshtajn, i cili erdhi edhe në emër të raporterit tjetër të Parlamentit Europian, pra të grupit të djathtë të Partive Popullore Europiane, të zotit Kukan, është tërësisht i mundshëm për t’ua arritur konsensusi.
Atëherë, çfarë diskutojnë? Një “po” dhe një “jo” është, çfarë diskutojnë ekspertët që kanë katër orë që janë mbyllur dhe çfarë diskutuat ju për dy orë?
Unë mendoj se, duke pasur parasysh frymën pozitive të takimit të sotëm, nëse z. Flekenshtajn me zotin Kukan do të ishin angazhuar vetëm një fundjavë pas rekomandimeve finale të “Venecias”, kjo çështje do të ishte zgjidhur dhe tani reforma do të kishte filluar të implementohej. Pra, mendoj se ka qenë më shumë një atmosferë komunikimi…
Keqkuptimi
… pak telefon i prishur dhe një frymë…
Pse në këtë pikë është politika shqiptare, z. Meta, që punon telefon i prishur dhe nuk kuptohet, mjafton të vijë një ndërkombëtar për dy orë, të kthejë dhe t’ju bindë sesi duhet votuar?
Kjo pa dyshim që është një përgjegjësi e politikës shqiptare, e cila duhet të marrë më shumë përgjegjësi dhe unë besoj se edhe takimi i sotëm është një rast i mirë për ta demonstruar këtë përgjegjshmëri.
