Fahri Kaçanolli, babai i Artur Kaçanollit, i cili akuzohet për organizimin e vjedhjes me pasojë vdekjen e dy kunatave në Durrës mbrëmjen e 2 shtatorit 2014, shprehet se i biri nuk ka lidhje fare me ngjarjen dhe po mbahet në burg për armëmbajtje pa leje.
Sipas tij, të birit, i cili është edhe nip i viktimave, nuk i është gjetur asnjë provë që e përfshin në ngjarje, veç njohjes me Indrit Shaqen, i cili mori përsipër krimin e dyfishtë.
Fahri, si e pritët deklaratën e Indrit Shaqes në gjykatë, i cili mori përsipër krimin, duke përjashtuar djalin tuaj nga krimi?
Për mua nuk ishte surprizë, sepse isha i bindur që djali im, Arturi, nuk kishte shkuar në vendin e ngjarjes, sepse ishim bashkë gjithë mbrëmjen dhe e gjeta gjithashtu në gjumë në mëngjes. Unë nuk e di se çfarë ka ndodhur konkretisht në atë ngjarje, kush dhe si janë përfshirë, por dal garant që Arturi nuk ka marrë pjesë në grabitjen me pasojë vdekjen e dy të afërmve tanë.
Sipas hetuesve, Arturi dyshohet të jetë organizatori i
ngjarjes…
Arturi është arrestuar se u gjet me armë pa leje dhe kishte njohje me Indrit Shaqen, të cilin e kemi banor të lagjes. Atë mbrëmje, Arturi e ka çuar me makinë deri në një lokal me muzikë tallava Indritin dhe ka ardhur menjëherë në shtëpi. Nuk ka dalë më deri në mëngjes. Kur e zgjova unë, i tregova çfarë kishte ndodhur. Në grabitje, Arturi nuk ka marrë pjesë dhe për këtë hidhem në zjarr, sepse ishte me mua gjithë mbrëmjen.
Si e shpjegoni faktin se Indrit Shaqa shkoi për të vjedhur pikërisht tezen e shokut të tij?!
Nëse Arturi do donte të grabiste dhe t’u merrte të moshuarave paratë, nuk kishte përse të vepronte me persona të tjerë. Arturi shkonte shpesh në atë shtëpi, sepse e kishte teze njërën prej tyre. Nuk do ta kishte të vështirë për të marrë ato që donte. Arturi nuk njihej fare me atë djalin nga Elbasani (Vilson Elmazi). Nuk di çfarë të them, por nuk mendoj se djali im ka qenë organizator, madje Indrit Shaqja, i cili mori përsipër krimin, i kërkoi falje Arturit për gjestin e shëmtuar që kishte kryer kundër tezes së tij, Gjinovefa dhe Elsa Vava.
Pse e shoqëroi djali juaj Indrit Shaqen atë mbrëmje?
Arturi dhe Indriti janë rritur në të njëjtën lagje dhe kanë aq konfidenca sa për t’i kërkuar njëritjetrit të tilla ndere. Vetëm sa e ka shoqëruar me makinë deri te lokali dhe është kthyer në shtëpi. Sikurse thashë, nuk ka lëvizur deri mëngjesin tjetër. Indriti ka deklaruar në gjykatë se kanë qëndruar disa orë në lokal dhe me Vilson Elmazin janë nisur drejt Durrësit ku kryen grabitjen. Më pas, janë rikthyer në lokal dhe kanë pirë dhe festuar deri në orët e para të mëngjesit. Ne shpresojmë që Arturi shumë shpejt do të dalë nga burgu, pasi është i pafajshëm.
Durrës Leonidha Musaj Panorama.al
