Ish-kryeministri Sali Berisha në një intervistë të gjatë me gazetarin Lutfi Dervishi dhënë për emisionin ‘Përballë’ në RTSH 1, ka folur për zhvillimet e politikës në vend. Duke folur për Dervishin, ish-kryeministri bën edhe krahasimet mes qeverisjes së tij dhe të Edi Ramës.
Vlerësimet për kreun e PD-së, Lulzim Basha dhe fushatën elektorale.
Më poshtë keni intervistën e plotë të ish-kryeministrit Sali Berisha:
LUTFI DERVISHI: Ndodhemi në mesin e fushatës elektorale dhe janë zgjedhjet e 9-ta parlamentare që nga viti ’91. Z. Berisha është i shtati në listën e qarkut të Tiranës. Si ndiheni me këtë numër dhe me këtë vend?
SALI BERISHA: Shumë komod, absolutisht.
LUTFI DERVISHI: Komod se është vend i sigurtë?
SALI BERISHA: Jo, nëqoftëse numri mund të pretendohej se mund të ishte më parë, unë them se mund të ishte edhe më mbrapa. Domethënë unë kam një problem në këto zgjedhje. Problemi im është një status që unë kam, të cilit edhe po të dua t’i iki, nuk i iki dot.
LUTFI DERVISHI: Në ç’kuptim status?
SALI BERISHA: Si ish-kryetari i PD-së, si ish-kryeministër, si ish e ish me radhë…
LUTFI DERVISHI: Domethënë po e frenoni veten për të mos qenë aktiv në fushatë?
SALI BERISHA: Padiskutim. Normale dhe s’mund të jem një zë vokal në fushatë sepse fushata ka një zë dhe ai është i liderit të partisë. Përpiqem me mënyrat e mia nga mëngjesi deri në darkë të ndihmojë PD-në. Kjo është.
LUTFI DERVISHI: Por aktiviteti juaj publik ndiqet më shumë se kushdo tjetër dhe jo vetëm në rrjetet sociale. Kjo fushatë është krejt e ndryshme nga të tjerat, por nuk kemi parë asnjë koment/qëndrim tuajin për fushatën?
SALI BERISHA: Ke të drejtë! Cila është fushata?! Cilat janë konsideratat e mia?! Kjo është një fushatë unike në historinë e vendit. Kemi një opozitë…
LUTFI DERVISHI: Kemi opozitë në këtë fushatë?!
SALI BERISHA: Kemi opozitë në këtë fushatë, opozitë të bashkuar, e cila në unikalitetin e fushatës, ka një program që do të thosha që pavarësisht se….
LUTFI DERVISHI: Të cilin unë ende nuk e kam gjetur në website…
SALI BERISHA: Që pavarësisht se analistët nuk e kanë kapur, por unë mund të them se është absolutisht një nga programet më revolucionare në 27 vjeçare historinë e vendit. Dhe ku qëndrojnë pikat?! Së pari, ky program ka kapur për brirësh problemin themelor të vendit, që është problemi i ekonomisë. Kryetari i PD-së në këtë program ka marrë përsipër një nga vendimet më të vështira dhe më të rëndësishme që mund të marrë një forcë politike në Europë, që është ulja e TVSH-së nga 20% në 15%. TVSH-ja është taksa e çdo shqiptari. Kur tha Edi Rama në vitin 2013-të se do të ulte taksat për 97% të shqiptarëve, unë automatikisht nënkuptova se ai po hiqte TVSH-në e ushqimeve dhe po ulte TVSH-në e energjisë dhe me këtë realisht i lironte shqiptarët nga barra e taksës në këto produkte që përbëjnë të ashtuquajturën “shportë” apo produkte më të rëndësishme dhe që lehtësonte xhepin e tyre. Lulzim Basha ka marrë një vendim jashtëzakonisht të rëndësishëm, do të zbresë në 15% TVSH-në. Pra, 400 milion euro do të mbeten në xhepat e shqiptarëve. Nuk është se do t’i bëjnë të pasur, por do t’u japin mundësinë të blejnë më shumë, të konsumojnë më shumë dhe t’i japin një nxitje të madhe ekonomisë.
LUTFI DERVISHI: Ju keni qenë president 5 vjet, keni qenë kryeministër 8 vjet. Keni ndjekur 9 fushata elektorale dhe në fushata elektorale shohim këtë gjë: premtim për ulje taksash dhe TVSH-je, edhe për tatim-fitimin e kam parë që e ka ulur 9% dhe premtim për rritje rrogash. Paratë vijnë nga mbledhja e taksave, që thuhet do të ulen dhe do të rriten shpenzimet për rrogat. Nga dalin paratë në këtë lloj ekuacioni?
SALI BERISHA: Shumë e drejtë kjo! çfarë ndodhi në 2005-ën. Ne nuk lëvizëm TVSH-në, por zbritëm taksën e sheshtë 10%. U rritën të ardhurat me aq shpejtësi…
LUTFI DERVISHI: Sepse u formalizua ekonomia…
SALI BERISHA: Po, bravo. U rritën të ardhurat me aq shpejtësi dhe ajo qe formalizim se nuk qe efekt i menjëhershëm i stimulit, se stimuli vjen më vonë, sa që ne për hir të së vërtetës nuk dinim sepse nuk kishim projekte të lëna nga qeveria e mëparshme për t’i vazhduar dhe ato të ardhura ia kthyem biznesit, duke ulur më tej taksat.
LUTFI DERVISHI: Shumë dakord, por 8 vjet më mbrapa ekonomia është disi e formalizuar…
SALI BERISHA: 8 vjet më mbrapa, në vlerësimin tim, ekonomia kishte nevojë jetike për një stimul të dytë të madh fiskal. Ekonomia kishte dhe ka nevojë… një ekonomi që vuan t’i nuk mund ta bësh të vuajë me më shumë me taksa, se ti po i shtove taksat, i shton ngarkesën. Këta i shtuan taksat. Këta rritën në mënyrë të papërgjegjshme taksat dhe thonë: ne marrim tani 30%-40% më shumë se përpara. Marrin vetëm 1/5 e asaj që duhet të merrnin me këtë rritje taksash, çka do të thotë se 4/5 janë informalitet. Pra, ulja e TVSH-së në vetvete….
LUTFI DERVISHI: Ju mendoni se ende ka hapësirë për të formalizuar….
SALI BERISHA: Absolutisht. Unë e pëlqej shumë masën e kryetarit të PD-së për uljen e TVSH-së, sikundër zbritjen në 9% të taksës së sheshtë, por pëlqej një premtim solemn, që ai po u bën fshatarëve dhe në tërësi prodhuesve, trarin e doganës. Unë kam qenë gjithnjë për tregun e lirë, por tregu i lirë kërkon disa rregulla për t’u respektuar. Nëqoftëse fermeri francez, fermeri italian subvencionon qumështin e lopës, duke i dhënë fermerit 3 euro në ditë për çdo krerë, fermeri shqiptar në rast se ne nuk ia mbrojmë prodhimin, fermeri shqiptar e ka të pamundur të përballet. Lulzim Basha ka marrë përsipër… E vërteta është se kësaj here është frymëzuar nga presidenti Trump, i cili po prish marrëveshjet e tregtisë së lirë. Pse po i prish marrëveshjet e tregtisë së lirë?! Sepse thotë që këto marrëveshje kanë vënë në pozita të pabarabarta fermerët e SHBA-së. E vërteta është se edhe ata marrin subvencione, por në plus-minuset e tij, presidenti Trump…
LUTFI DERVISHI: Në këtë logjikë do të themi se nuk jemi fort pro BE-së, në kuptimin e integrimit sepse dihet që beteja në BE bëhet pikërisht për këto gjëra..
SALI BERISHA: Jo, ne jemi për BE-në. Këtu ka një gjë. Ka një modifikim në qëndrimin e levizjes së lirë në pamje të parë, por nuk është modifikim. Sepse qeveria e ardhshme do t’u thotë partnerëve: po hajde urdhëroni një për një, por hiqni ju subvencionet, se dhe subvencionet në vetvete janë një kundërshtim flagrant me parimet e tregtisë së lirë. Nëse …
LUTFI DERVISHI: Kështu funksionon BE-ja. Subvencionet i ka si politikë të vetën…
SALI BERISHA: Atëherë ka subvencione, atëherë dhe unë do të bëj çdo gjë që fermerët shqiptarë të maten me fermerët belg apo me fermerët francezë si një me një. çfarë do të thotë kjo?!
LUTFI DERVISHI: Kjo është beteja që bëhet mes ministrit danez, ministrit francez. Po a i ka Shqipëria këllqet për t’u futur në këto lloj betejash?
SALI BERISHA: I ka plotësisht Shqipëria se Shqipëria nuk është anëtare njëherë. Ngadalë-ngadalë, Shqipëria ka dhe dhjetëra kapituj… kur të hapen negociatat janë dhe dhjetëra kapituj. Dhe derisa të shkojmë në atë momentin sa të nënshkruajmë marrëveshjen, ne kërkojmë… se çfarë jemi ne në dallim nga vendet e tjera?! Në dallim nga vendet e tjera… ne nuk jemi vend fshatarë se nuk mund ta them këtë se tani fatmirësisht në urbanizim predominon pjesa urbane në Shqipëri, por prapë kemi mbi 45% të popullsisë në fshat. Atëherë nëqoftëse ne nuk i vëmë këta njerëz në pozita… të barabarta nuk i vëmë dot kurrë, por të paktën të themi diçka si më të barabarta me traun e doganës, se ka një gjë: trau i doganës i intereson qeverisë. Pse i intereson qeverisë, se vjen aty merr taksën dhe merr tarifën doganore dhe ikën ajo.
LUTFI DERVISHI: Një problem, se kemi marrëveshjen e tregtisë së lirë me vendet e rajonit…
SALI BERISHA: Atëherë marrëveshja e tregtisë së lirë do të ketë modifikime në këtë rast në kuptimin e modulit sezonal.
LUTFI DERVISHI: Ju z. Berisha ju referuat presidentit Trump, por presidenti Trump është presidenti Trump, Amerika është Amerikë. Shqipëria ndoshta nuk e ka fuqinë për të marrë vendime unilaterale.
SALI BERISHA: Fuqinë nuk e ka për të marrë vendime unilaterale, por Shqipëria e ka plotësisht fuqinë për të mbrojtur prodhimet e veta. Për shembull, ne bënim një mbrojtje. Ne kishim module sezonale në dogana për prodhimet bujqësore dhe në kulmin e prodhimit në sezon, ne fusnim modulin e tyre. Nuk ishte një mbrojtje e plotë, por ishte një lloj mbrojtjeje. Kurse kryetari i PD-së ka marrë përsipër mbrojtje të plotë. Lutfi, viti që shkoi ka qenë vit nga më dëshpëruesit për qindra dhe mijëra fermerë shqiptarë…
LUTFI DERVISHI: Sepse lanë prodhimin dhe ju kthyen hashashit?
SALI BERISHA: Jo, nuk e lanë. Disa,.. por jo Myzeqeja. Myzeqeja prodhoi në sera, por arriti një kilogram i domateve në 200 lekë të vjetra, që nuk ia vlente transporti sepse e fusnin dhe nga jashtë. Kjo ishte një dëm shumë i madh. Mendoj se shtyllë tjetër madhore e programit të Lulzim Bashkës janë pensionet…
LUTFI DERVISHI: Dakord z. Berisha, por nga dalin paratë? Domethënë rris pensionet në 250 mijë lekë ul TVSH-në 15%, ul tatimin nga 23% që është maksimali në 9%, që do të thotë se janë të gjitha para…
SALI BERISHA: Vendi ka një histori. Kur u ndërmorën këto masa, të ardhurat nuk ranë, por u rritën ndjeshëm. Kur u morën këto masa Lutfi, të ardhurat u rritën në atë shkallë sa vendi ia doli në 8 vite të ndërtojë 11 mijë km rrugë, të mbi dyfishojë rrogat e mesme, të dyfishojë rrogat e ulëta…
LUTFI DERVISHI: Ekonomia rritej me 8% në atë kohë, ishte kontekst tjetër, nuk ishte kriza globale…
SALI BERISHA: Ajo që thua ti është e vërtetë…
LUTFI DERVISHI: Z. Berisha më vjen shumë mirë që jemi në debatin real që duhet të ishte bërë në këtë fushatë, që do të thotë për ekonominë dhe për masat konkrete…
SALI BERISHA: Në fakt, kryetari i PD-së nëqoftëse e ndiqni, por po e censurojnë në mënyrë mizore mediat, një censurim barbar… po të shohësh Edi Rama hap frigoriferin dhe del duke folur…
LUTFI DERVISHI: Çfarë censurimi, se partitë raportojnë vet tani, nuk është se ka ndonjë media që ka nevojë për censurim.
SALI BERISHA: Transmetimet live…
LUTFI DERVISHI: Janë të pabarabarta?
SALI BERISHA: Janë 5 me 1…
LUTFI DERVISHI: Nuk çensurohet dot facebook-u që ndiqet.
SALI BERISHA: Por nga ana tjetër, premtim tjetër madhor është ky i pensioneve. çfarë do të ketë ky?! Kjo paketë po të shkojmë në doktrinë, ka një miks të Hayek-ut, të Friedman-it me Keynes. Ky synon me çdo kusht të rris dhe të nxis konsumin, jo vetëm ofertën, por edhe kërkesën. Me rritjen e madhe të pensioneve, me krijimin e një fondi të qëndrueshëm dhe ushqimin e tij, i jep një spostim të ri ekonomisë, nivelit të ekonomisë. Unë them se kurrë ndonjëherë në ndonjë fushatë nuk është folur më shumë për ekonominë se ç’po ndodh në këtë fushatë që po përpiqet ta censurojnë.
LUTFI DERVISHI: Unë do të thoja se në 2005-ën dhe 2009-ën është folur më shumë për ekonominë, të paktën për sa kohë që kemi ndjekur fushatën.
SALI BERISHA: Problemi është se nuk të lejojnë ta ndjekësh këtë fushatë ty se këta po e censurojnë komplet.
LUTFI DERVISHI: E kam ndjekur edhe nëpër studio, nuk është se bëjnë debat shumë për ekonominë. Nuk është normale që 2 javë para ditës së votimit të flasësh për listat e PD-së, por debati për to mori kohë. Dhe të pakënaqurit dhe kritikët, që nuk mungojnë në këto raste, ju referuan shkeljeve të statutit dhe faktit se ju që keni qenë në krye të PD-së, për listat e deputetëve keni mbledhur kryesinë.
SALI BERISHA: Njeriu i fundit që mund të pyetet për problemet e brendshme të PD-së jam unë. E them këtë me sinqeritetin më të madh. Pse? Përsëri statusi im është i tillë. Çdolloj qëndrimi publik mua më krijon përshtypjen se do të më nxirrte nga statusi im i një njeriu të dorëhequr njëherë e përgjithmonë, i njeriut të larguar pa rikthim. Dhe në këtë mes, kryetari ka pranuar që këto janë listat e fundit që bëhen në këtë mënyrë. Dhe çfarë mund të them për këtë?! Lista, çdo njeri po të bënte një listë… nuk ka diskutim që kryetari ka të drejtë të patjetërsueshme të ketë listën e tij. Mënyra…
LUTFI DERVISHI: Që me këtë listë të fitoj dhe të bëhet kryeministër….
SALI BERISHA: Po, që të fitoj dhe të bëhet kryeministër…
LUTFI DERVISHI: Po nëse nuk bëhet dot kryeministër, çfarë bën kryetari?
SALI BERISHA: Nëse nuk bëhet dot kryeministër, Lulzim Basha ka përcaktuar se nëse nuk fiton zgjedhjet do të bëj zgjedhjet për kryetarin e PD-së në korrik. Këtu kemi dy qëndrime…Edi Rama thotë…
LUTFI DERVISHI: Ta lëmë Edi Ramën një sekondë se kam një pyetje.
SALI BERISHA: Jo s’ka diskutim, se thotë që po nuk fitova zgjedhjet …
LUTFI DERVISHI: Në 2013-ën ju keni vendosur një standard si kryetar i PD-së…
SALI BERISHA: Nuk është i domosdoshëm ai standard për të gjithë. Ta themi atë që është..
LUTFI DERVISHI: Dakord, t’i referohemi një standardi tjetër. Në momentin e Brexit nga një votim iku një klasë politike. Domethënë ikën ata që ishin pro, ikën ata që ishin kundër. Qarkullimi i elitave nënkupton se nëse ti ke fuqinë për të përcaktuar gjithë listën dhe të thuash “është lista fituese, do të bëhem kryeministër”, nëse ti nuk bëhesh kryeministër, atëherë gjithë ky pushtet shkon me një përgjegjësi më të madhe…
SALI BERISHA: Nuk ka diskutim që shkon në një përgjegjësi më të madhe. Kushdo që më pyet mua “po si ndodhi që i more të gjitha përgjegjësitë mbi vete?”, shumë thjesht i them se kryetari ata që i kishte përreth i kishte pëlqyer vet në një mënyrë ose në një tjetër i kishte përzgjedhur vet dhe asnjeri nuk ia kishte vendosur atij në ato pozicione. Nuk është se ata nuk kishin secili nga pak përgjegjësi…
LUTFI DERVISHI: Sipas rretheve…
SALI BERISHA: Po kryetari e kishte përgjegjësinë dhe kryetari mban përgjegjësinë kryesore. Lulzim Basha ka deklaruar se do të bëhen çdo dy vjet zgjedhjet e kryetarit të PD-së, pas çdo zgjedhje lokale dhe pas çdo zgjedhjeje të përgjithshme.
LUTFI DERVISHI: Po, por në momentin që shuhen të gjithë zërat kritik, zgjedhjet brenda partisë kthehen në një formalitet.
SALI BERISHA: Jo, nuk shuhen. Zërat kritikë nuk shuhen kurrë në asnjë parti, as në partinë demokratike. Por kjo është një periudhë dhe unë e shfrytëzojë këtë rast dhe unë e shfrytëzoj këtë rast t’i bëj thirrje çdo demokrati, çdo qytetari të bëjnë gjithçka në këtë prag fitoreje të sigurtë të opozitës shqiptare. Kurrë ndonjëherë nuk e ka patur populli i opozitës më afër, më të prekshme, më të mundshme fitoren, se sa në këto zgjedhje. Imagjino kë kanë kundërshtar. Kanë kundërshtar një njeri i cili pasi mashtroi, pasi shpalli platformë me 42 premtime dhe ka zbatuar vetëm një prej tyre, heqjen e TVSH-së për ilaçet, paçka se çmimi i ilaçeve është rritur me 30% në krahasim me 3 vjet më parë…
LUTFI DERVISHI: Sidomos ilaçet që prodhohen në vend…
SALI BERISHA: Më fal, çfarë ndodh tani?! Shihe! Ju thashë që fushata është shumë e veçantë. Ke një opozitë që paraqet një program, ke një qeveri që ka zero bilanc para qytetarëve, ka zero projekte para qytetarëve. Në çdo platformë që shkon flet për shoferin, flet për timonin, flet për sahatin e Tiranës që ndaloi ditën që ai iku nga Bashkia dhe nuk punoi 4 vite më, i zemëruar sahati. Flet për çdo gjë, por nuk tregon dot një punë publike të përfunduar, nuk flet një fjalë për TAP-in, nuk flet një fjalë për Devollin, nuk flet një fjalë për përfundimin e hidrocentralit të Banjës, për hidrocentralet e Fanit…
LUTFI DERVISHI: Këto të dyja, TAP-i dhe Devolli janë ndër faktorët kryesorë që çojnë në rritjen ekonomike ende në 3.5 për qind…
SALI BERISHA: Po janë projekte të qeverisë time…
LUTFI DERVISHI: Absolutisht… kam vetëm një të fundit për ta mbyllur…Koha për të bërë kritika ndaj listës është e pavend, por a keni ju një koment për kritikat e kritikëve të bujshëm të listës, – ku spikasin zoti Imami dhe zonja Topalli?
SALI BERISHA: Unë nuk kam asnjë koment për qëndrimin e asnjeriu. Duhet të dish një gjë. Ata me të cilët unë mbylla kapitullin tim më 20 korrik të vitit 2013. Ata janë ish bashkëpunëtorët e mi dhe miqtë e mi për aq kohë sa ata të dëshirojnë të ruajnë ato raporte. Natyrisht kryetari i ri i PD-së ka absolutisht të drejtë të zgjedh ekipin e tij pa asnjë lloj hezitimi në këtë aspekt sepse thotë se unë me këtë ekip do të fitojë, me këtë ekip do të qeverisë…
LUTFI DERVISHI:..Është një ekip që kërkon të qeverisë, por pyetja ime është: kaq e vështirë për një parti që pretendon pushtetin të respektonte kuotën gjinore në listat për deputet? Në 5 qarqe është gjobitur nga KQZ, ndërkohë që sa i përket kuotës gjinore PD është me shkelje në 12 qarqe…
SALI BERISHA: Unë në atë ekspoze që kam dëgjuar PD vërtet ka marrë një gjobë, kurse numri nuk është i pavlerë. Janë 29 vajza dhe gra nga më cilësoret në listat e PD-së. Sidoqoftë jam absolutisht i mendimit se roli i grave dhe vajzave duhet të vij në rritje. Nuk mendoj se Edi Rama është në shpirt njeri i emancipuar. I kujtojë vetëm atë që ka bërë me deputetet e listës së Lezhës…
LUTFI DERVISHI: Dorëheqjen e dy zonjave…
SALI BERISHA: Dorëheqjen e dy zonjave mizorisht. Njërën e kërcënuan me djalin, tjetrën e kërcënuan me pengmarrje. Të gjitha ato u bënë para Edi Ramës. Unë sot kam postuar në Facebook-un tim një video, në të cilën del kryetari i Bashkisë së Pukës duke ofenduar si një ordiner një zonjë që ka shkrirë jetën e saj në shërbim të qytetarëve të Pukës. Mjeke, mund të ketë mbi 30 e ca vjet që i shërben pukianëve. Pra, këta janë një grup mizogenësh, njerëz të cilët kanë përçmim për gratë dhe që
LUTFI DERVISHI:…por që formalisht respektojnë kuotën gjinore…
SALI BERISHA: Respekti më i madh që mund t’u bësh grave sot është të gjesh punë për to, të gjesh punë për fëmijët e tyre, t’u japësh mundësi të shkollohen fëmijët e tyre, çka po zotohet më shumë se kushdo tjetër Lulzim Basha me anulimin e ligjit të arsimit, ligj i cili në thelb goditi të varfrit e këtij vendi, mbylli dyert për ta. Sot një prind duhet të paguajë për një fëmijë, aq sa ç’paguante katër vite më parë për 3 fëmijë, edhe do të shkojë më lart.
LUTFI DERVISHI: Bie në sy që fushata e PD-së është përqendruar vetëm te kryetari. Nuk ka si të themi numër 2 apo 3. Por është komentuar edhe fakti që ka shumë pak flamuj të PD-së dhe simbolet historike të kësaj partie, pothuaj mungojnë. Madje në mënyrë paradoksale edhe simbolin me dy gishta e përdor kryeministri Rama.
SALI BERISHA: Problemi është ky, simbolet e PD-së unë i kam parë në çdo miting.
LUTFI DERVISHI: Jo dukshëm.
SALI BERISHA: Në tërësi kjo është një fushatë dekorativisht e varfër, çka duhet lavdëruar të themi të vërtetën. Kjo do të thotë më pak para në fushatë. Sepse për ta qëndisur një miting shkonin mijëra e mijëra euro dhe të gjitha përfundonin pas mitingut. Unë e kam kuptuar në këtë mënyrë këtë sepse në të gjitha anët unë e kam parë më modeste fushatën se sa kanë qenë fushatat e tjera. Unë kështu e kam kuptuar.
LUTFI DERVISHI: Kë ka përballë në këto zgjedhje Partia Demokratike?
SALI BERISHA: PD përballë ka ish mazhorancën apo atë që quhej aleancë e qelbësirave.
LUTFI DERVISHI:…Vetëm se sulmi deri më tani, artileria është drejtuar vetëm nga LSI-ja.
SALI BERISHA: Padiskutim që kundërshtarë kryesor dhe në mënyrë të vendosur ka Edi Ramën dhe pas tij Ilir Metën në proporcion me aksionet që ata kanë…
LUTFI DERVISHI: Petrit Vasilin doni të thoni?!
SALI BERISHA: Petrit Vasilin, më fal… S’ka diskutim që Edi Rama është kundërshtari kryesor që çdo ditë e më shumë më del më i dobësuar. Lutfi nuk kam parë kurrë në jetën time…
LUTFI DERVISHI:..Të dobësohesh sot duhet të harxhosh para në një farë mënyre…
SALI BERISHA: Nuk kam parë kurrë në jetën time një fushatë si kjo e këtij viti. Katër vite më parë Edi Rama kaloi shesh më shesh duke bërë një seri premtimesh, premtime shumë të mëdha dhe të vështira, por të realizueshme. Nëse do të ishte serioz Edi Rama, në mënyrë absolute vendoste sistemin e shëndetësisë falas. 2-3 vende e kanë në botë atë dhe ato përpiqen ta heqin. Po ky e premtoi.
LUTFI DERVISHI:..Vendet që ju i referoheni i japin 9-10 % të GDP. Si do ta bëjmë ne me 2%?
SALI BERISHA: Ai e premtoi. Kur premtova dyfishimin e rrogave të mësuesve, kam qenë në Elbasan në vitin 2005…kush e ka besuar që do të ndodhi? Kanë qenë 44 mijë arsimtarë. Nuk e kanë besuar që do të ndodhte ndonjëherë. Dhe ai ka qenë ndër premtimet më të vështira të jetës time. Dhe jo u realizua, por u tejkalua, shkoi 120%. Po të dojë qeveria të mbajë zotimin, absolutisht e mban. Premtoi heqjen e TVSH-së për 5 ushqimet bazë…
LUTFI DERVISHI:..Uljen në 6% në mos gaboj…
SALI BERISHA: Jo uljen në 6% e premtoi për energjinë, premtoi uljen nga 20 në 6 përqind. Nuk lëvizi asnjë për qind TVSH-në e asnjë prej këtyre produkteve. Mashtroi. Premtoi legalizime falas. Dha vetëm letrat e indulgjencës dhe nuk ka dhënë asnjë tapi falas, por përkundrazi me një çmim 3-4 herë më të shtrenjtë. Premtoi 5-fishim të fondeve për bujqësinë. Ka bllokuar të gjitha grantet. Flet dhe në mënyrë të papërgjegjshme thotë se kanë krijuar agjencinë e garantimit të kredive për bujqësinë. E ka krijuar, por hajde merre po deshe.
LUTFI DERVISHI: A është pjesë e marrëveshjes tashmë, kjo agjenci, AZHBR-ja, që i takon PD-së
SALI BERISHA: Jo, nuk e lëviz dot atë. Nuk e merr dot për një muaj, është çështje studimi pastaj.
LUTFI DERVISHI: Po të paktën ndaloi shpërndarjen e fondeve…
SALI BERISHA: Deklaroi se kanë dhënë 1 mijë kredi. E di sa kredi ka dhënë?! Unë këtu i kam po të duash, ka dhënë gjithsej14 kredi nga fondi dhe e kam listën emërore të kësaj qeverie se kush ka marrë kredi. Pra, bujqësisë ky i çoi pothuaj 0 investime. Fshatit i tha: nuk janë rrugë këto që ka bërë Sali Berisha, unë do të bëjë rrugët e parcelave. Absolutisht nuk ka bërë një metër rrugë. Do të them një kuriozitet. Nuk flet dot për 1 km rrugë në të gjitha këto takime. Po një gjë thotë. Jo qeveria e mëparshme, por e ndjej me shumë pikëllim faktin se qeveria e vitit 1996 çfarë bëri në atë mandat?! Dy rrugë i bëri. Bëri 6 km rrugë nga Tirana te Ura e Limuthit, autostradën nëse të kujtohet…
LUTFI DERVISHI: Pa shkuar deri në Vorë…
SALI BERISHA: Dhe bëri të dytën rrugën Fushë-Krujë- Milot, që e lamë vetëm për inaugurim. Nuk shkova ta inauguroja se thashë ta inauguronin ata që do vinin. Pra, në 4 vite, me një buxhet të paktën 10-15 herë më të vogël se ky bëmë dy rrugë. Ky në katër vite nuk bëri dot 3 km Lungomare…
LUTFI DERVISHI: I është rikthyer shesheve…
SALI BERISHA: Ta sqarojë punën e shesheve se është një mashtrim i madh…
LUTFI DERVISHI: Ju do të thoni se është projekt i fondit amerikan dhe ka filluar në Berat…
SALI BERISHA: Ai projekt ka filluar me qeverinë e mëparshme…në Berat. çështja shkoi deri aty sa që detyroi në një akt të paprecedentë fondin…që lëshoi një deklaratë për Pazarin e Ri. Ai është projekt tërësisht i ideuar nga Fondi Shqiptaro-Amerikan që kërkon një mbështetje simbolike nga qeveria, që financohet në tërësi nga fondi. Dhe që Edi Rama që bën si ai te historia me malazezin. E di ti atë?!
LUTFI DERVISHI: Unë di shumë histori me malazezë…
SALI BERISHA: Shkoi një malësor nga anët tona, i shkoi mysafir Knjazit. Doli në mëngjes në oborr me shëtit. Shkoi e pa druvarin që çante drutë dhe bënte “ëh’. çfarë di ti të bësh, e pyeti. I tha, unë bëj “ëh”. Edhe ky tani i fut poezi.
LUTFI DERVISHI:..është edhe ai varianti me Nastradinin që ndahet puna, njëri bën “ëh” dhe tjetri çan drutë…
SALI BERISHA: Kështu bën edhe ky, projekte urbane, të cilat janë që të gjitha të Fondit Shqiptaro-Amerikan me një kontribut pjesor të qeverisë shqiptare. Qëllimi i tyre, gjallimi i tregut në qendrat e qyteteve.
LUTFI DERVISHI: Nuk është normale të bësh këtë pyetje, por unë do ta bëj, meqë u morët me kryeministrin. Në vlerësimin tuaj objektiv çfarë ka bërë mirë kjo qeveri gjatë këtyre katër viteve?…. (kërkohet kohë të mendoheni…?)
SALI BERISHA: Kjo është kështu. Si të më thuash ti mua zhytu në një kënetë dhe gjej gjilpërën. A ka njeri që të zhytet në llucë e të gjej gjilpërën në llucë? E ke raportin e sotëm për drogat. është katastrofal për Shqipërinë raporti i sotëm për drogat. Ky ishte një nga aktet më të papërgjegjshme në historinë e vendit pas diktaturës. U luajt shumë rëndë me reputacionin dhe me shumë gjë për vendin. Sot raporti i Europolit damkos Shqipërinë si problem kryesor të drogës në Europë, qoftë në drogat e forta, heroinë, kokainë, qoftë në marjuanë.
LUTFI DERVISHI: Në fushatë po flitet për Republikën e Re dhe Shqipërinë që duam, por nuk dëgjohet më në fushatë fjala kanabis, kanabistan, narko-trafik. A është heshtja pjesë e marrëveshjes së 18 Majit?
SALI BERISHA: Jo, nuk është, të garantoj. është një diçka tjetër. Nëse sheh pollet, ato tregojnë se cilat janë shqetësimet kryesore të qytetarëve
LUTFI DERVISHI: Punësimi i pari…
SALI BERISHA: Korrupsioni… Në hierarkikë e tyre… çdo forcë politike e ka të qartë… po marrë kriminalitetin për shembull. Ti je i detyruar të qëndrosh kundër krimit, je i detyruar të qëndrosh dhëmb për dhëmbë sepse po nuk qëndrove ti si politikan, njeriu i thjeshtë nuk qëndron dot fare. Por ti e ke të qartë që në perceptim ai nuk ka atë kuotë për të cilën ti e lufton apo ti merresh, ama ky është një problem tmerrësisht i rëndësishëm dhe duhet të merresh. Kjo është çështje sigurie dhe për ata që e kanë sigurinë të parën, ka një rëndësi kryesore. Për ata që janë të gatshëm të pranojnë rreziqe dhe të qëndrojnë indiferentë ndaj rreziqeve është një problem.
LUTFI DERVISHI: Një ide e hedhur në këtë fushatë nga z. Basha është revokimi (heqja) mandatit të deputetit nga populli. Kjo ide është hedhur nën ombrellën e Republikës së Re, por pas një kërkimi më rezulton se nuk ka asnjë vend demokratik që aplikon revokimin e mandatit të deputetit.
SALI BERISHA: Në dijeninë time e kanë SHBA…
LUTFI DERVISHI: Vetëm për guvernatorin, jo për kongresmenët dhe senatorët…
SALI BERISHA: E ka Zvicra, e ka Portugalia, por duke thënë këto, nuk është një praktikë e shumicës së vendeve. Unë di se e kanë një seri vendesh…
LUTFI DERVISHI: Marrëveshjen politike, mes kryeministrit Rama dhe kryetarit të Partisë Demokratike Basha, që për shumë komentatorë dhe vëzhgues të brendshëm dhe të huaj ishte e papritur, ju e paralajmëruat 3 javë më herët, më 26 prill dhe e vlerësuat: win-win. A ka kjo marrëveshje edhe pjesë të pashkruara…
SALI BERISHA: Të besosh një “gentelman agreement” me Edi Ramën është si t’i besosh rrethit katror. Ai me shkrim …
LUTFI DERVISHI: Z. Rama ofroi më shumë se McAllister…
SALI BERISHA: Ofroi se e pa greminën. Ai pësoi një goditje politike që nuk e ka pësuar ndonjë kryeministër në historinë e vendit, në prag të zgjedhjeve. Dhe opozita e fitoi betejën, në kuptimin që çështjet që ajo ngriti u konsideruan çështje të rëndësishme, por nga ana tjetër ai në fund të fundit shpëtoi veten sepse ai po ecte…
LUTFI DERVISHI: Pse? çfarë mund t’i ndodhte?
SALI BERISHA: Së pari, mund të shkonte vetëm në zgjedhje dhe hynte në histori si autor i zgjedhjeve moniste. Së dyti, as unë, as ti dhe askush tjetër nuk mund të parashikojë se çfarë do të ndodhte këtu në datën 19 qershor po të shkohej në zgjedhje në atë mënyrë. Cila do të ishte temperatura e zemërimit të qytetarëve? Dhe pastaj si do të ishte polarizimi ekstrem i shoqërisë? Pra, faktikisht ai hapte një shteg, më të rrezikshmin. Këto skema janë të njohura se ku të çojnë. Në këtë mes ai pa në fund të fundit sensin që të tërhiqej nga një udhëtim politikisht fatal për të.
LUTFI DERVISHI: Nga shpjegimi që ai ka bërë duket sikur arriti në marrëveshje për shkak të qëndrimit në bllok të të gjitha partive pro paketës McAllister dhe tha do të shkojë në këtë takim dhe do të bëjë një marrëveshje me Lulzim Bashën…
SALI BERISHA: Mundet. Pse e mori kthesën menjëherë. Sepse në Elbasan foli gjithato… Unë thashë: çfarë ndodhi? Kaloi ylberin nga tuneli? Atë nuk e dimë. Mund t’i ketë thënë kush, mund të jetë kërcënuar, shiko se opozita plotësoi kushtet, po nuk i plotësove ja ku është kartoni i kuq dhe nuk ecet kollaj vetëm, mundet të jenë ato që thotë ai…. nuk kanë rëndësi këto. Rëndësi ka që ai arriti të marrë vendimin të marrë kthesën 180 gradë. Lëshoi në të gjitha aspektet. Nuk shkuan zgjedhjet në korrik, gjë për të cilën unë personalisht po të isha pyetur, nuk do të kisha qenë për zgjedhjet në korrik. Fushatat elektorale mund të jenë 3 javëshe, mund të jenë më të gjata apo më të shkurtra…
LUTFI DERVISHI: Në marrëveshjen e arritur flitet për reformë zgjedhore dhe reformë kushtetuese. Që do të thotë se bëhen me bashkëpunimin e forcave të mëdha, nuk mund të bëhen ndryshe. Çfarë mendoni se duhet të adresojë reforma kushtetuese?
SALI BERISHA: Mendoj se reforma kushtetuese mund të japë një shëmbëlltyrë të re për disa institucione të vendit. Në sistemin e zgjedhjeve unë mbetem ithtar i proporcionalit të pastër sepse nuk jam unë në linjën e përjashtimit të atyre që nuk e ndjejnë veten të përfaqësuar tek ti. Ky është një problem. Partitë e mëdha përfaqësojnë shumicën, por partitë e mëdha nuk përfaqësojnë që të gjithë.
LUTFI DERVISHI: Ju keni thënë që partitë e vogla përfaqësojnë afro 30% të votave të elektoratit. Cili është sistemi që bën drejtësi ndaj tyre, por edhe garanton stabilitet qeverisës?
SALI BERISHA: Nuk ka vuajtur Shqipëria nga mungesa e stabilitetit qeverisës. Po marrim mandatet. Fatos Nano i sosi dy mandate duke dhënë dorëheqjen. I pati të brendshme ato, jo nga opozita…
LUTFI DERVISHI: Qeverisjen e parë nga opozita…
SALI BERISHA: Po dakord, qeverisjen e parë, po ato kurthet që i bënë Majko me Metën janë regjistruar në analet e historisë, nuk mund të hiqen nga analet. Por ka një gjë këtu. Në kongres e ke parasysh. Majko ishte kryeministër, e rrëzoi…
LUTFI DERVISHI: E rrëzoi Meta pastaj…
SALI BERISHA: Po, e rrëzoi Meta Majkon. Por në fund të fundit në 2001-shin u dhunuan rëndë zgjedhjet, u bë një zgjidhje e pranueshme, një president konsensual. Kaluan dy mandate. Pra, nuk është ky problemi. Problemi më i paimagjinueshëm ndodhi mandatin e fundit. Nuk mund të kishte kurrë një qeveri me aleatë dhe dy armiqtë brenda. Kjo nuk ndodh sepse…
LUTFI DERVISHI: Për mandatin që po mbyllet?
SALI BERISHA: Po, për mandatin që po mbyllet. Sepse kjo ishte dërrmuese për vendin.
LUTFI DERVISHI:..Nuk ka qenë keq për opozitën..,
SALI BERISHA: Jo, ishte mirë. Por prapë së prapë luajaliteti është një kusht për një qeverisje. Por Edi Rama nuk kishte as minimumin e integritetit të një shtetari sepse në mënyrë kategorike nuk duhet të qëndronte qoftë edhe një muaj të vetëm në qeveri në ato sherre që u krijuan. Do të qeverisim apo do të dalim dhe shkojmë në zgjedhje të na i japë sovrani.
LUTFI DERVISHI: Duke folur për reformën kushtetuese. Shqiptarët shkojnë në votime më 25 qershor, por si ata që votojnë si ata që nuk votojnë, si ata që abstenojnë e dinë se cilët do të jenë deputet në qarqet e tyre. Gara bëhet për të përcaktuar përbërjen e 20% të Kuvendit. Shqiptarët votojnë, por nuk zgjedhin. Të zgjedhurit i kanë përcaktuar kryetarët e partive. A mendoni se duhet adresuar diçka thelbësore në kuadrin e reformës kushtetuese?
SALI BERISHA: Adresimi që parashikon kryetari i PD-së është vendosja e sistemit mazhoritar, ku qytetarët të zgjedhin deputetin. Dhe nëse vendoset sistemi mazhoritar…
LUTFI DERVISHI: I referoheni sistemit nga viti 1992-2008? apo mazhoritar i pastër?
SALI BERISHA: E ka Britania e Madhe këtë. Por këtij sistemi mund t’i shtohen edhe primaret në përcaktimin e deputetëve dhe kjo s’ka diskutim që përfaqësuesit e bënë më direkt dhe më të afërt të qytetarit. Kjo është një formë dhe jep një kontakt direkt. Ndërsa tjetër formë, e cila në pamje të parë do të vlerësonte meritën do të ishte lista e hapur, por unë kësaj nuk i besoj. Pse nuk i besoj? Sepse me listën e hapur do të fitonin të fortët, ata që kanë para dhe ata e rrethojnë kryetarin si të duan.
LUTFI DERVISHI: Lista e mbyllur funksionon mirë kur partia ka institucione dhe ka primare dhe ushtron presion për të përmirësuar cilësinë e listave. Jemi në një moment shumë interesant kur flasim për ndryshimet kushtetuese. Do të doja që të shtjellonim çështjen e një marrëveshjeje që është përfolur shumë, marrëveshja e vitit 2008 që ju keni bërë me z. Rama. Nga distanca 9 vjeçare a keni një vlerësim për ndryshimet kushtetuese të vitit 2008. Ndryshimet prodhuan stabilitet qeverisës dhe shmangën krizat për zgjedhjen e Presidentit. Por në përfaqësimin parlamentar – u desh ligji i dekriminalizimit për të pastruar Kuvendin. Në atë kohë mbaj mend se ju keni thënë që me këtë lloj sistemi do t’i japim parlamentit një elitë. çfarë shkoi keq që mbërritëm në një situatë të paprecedentë në këtë mandat që po mbyllet?
SALI BERISHA: Në dijeninë time në të gjitha legjislaturat e mëparshme nuk ka patur vrasës në Parlament. Ka patur plagosës dhe ka vepruar drejtësia. Por vrasës me precedentë vrasësish dhe trafikantë precedentë trafikantësh nuk kanë ekzistuar në parlamentin shqiptar. Kjo është një risi negative, shumë negative që solli Edi Rama në konceptin e tij të krimit të dobishëm. Unë kam bindjen më të thellë se qëndrimi i Edi Ramës ndaj krimit buron nga koncepti krejtësisht i gabuar i krimit të dobishëm për pushtetin. Krim i dobishëm për pushtetin do të thotë që pushtetari të realizojë përmes krimit ato që nuk realizon dot përmes ligjit. Kjo është e vërteta. Di shumë mirë, që u ka thënë ambasadorëve kryesorë në Tiranë se unë ata të veriut i kam sepse ata kanë qenë të Berishës. Asnjë nuk ka qenë në Parlament, por ato zona me ata njerëz qeverisen. Nuk është kurrë e vërtetë. Pra, Edi Rama e bazoi nënshtrimin e zgjedhësve përmes kriminelëve dhe e futi vendin dhe veten në një spirale shumë të rrezikshme. Nuk ishte faji i ndryshimeve kushtetuese.
LUTFI DERVISHI: Po, por ato ndryshime kushtetuese forcuan pushtetin e kryetarëve të partive dhe partitë politike tek ne më shumë se organizata me program dhe statut janë parti kryetarësh.
SALI BERISHA: Janë, ashtu është.
LUTFI DERVISHI: Ju keni një përvojë të konsiderueshme në politikën shqiptare, që nga viti ’90. pyetja është pse është kaq i vështirë demokratizimi i brendshëm i partive politike në Shqipëri, duke e nisur nga Partia Demokratike.
SALI BERISHA: E vërteta është se në tërësi partitë, në të gjithë botën, janë parti liderësh. Të themi atë që është. Natyrisht, absolutisht, institucionet e saj janë të rëndësishme dhe shumë të rëndësishme dhe duhet të forcohen. Por të them se nuk janë parti kryetarësh…. janë parti kryetarësh.
LUTFI DERVISHI: -Si kur janë të vogla, si kur janë të mëdha…
SALI BERISHA: Parti kryetarësh janë. Po të shohësh zgjedhjet që bëhen në partitë e mëdha, Sali Berisha në 20 e ca vite është zgjedhur shumicën e rasteve, me përjashtim të një rasti me mbi 90 për qind, në të gjitha rastet e tjera nga 70-80 për qind. Unë di liderë të partive të mëdha europiane që zgjidhen me 98% sa herë votohen. Partitë e kanë këtë solidaritetin… ndonjëherë zgjedhin me aklamacion, me duartrokitje.
LUTFI DERVISHI: Në Perëndim ndodh një gjë, është kjo që thoni ju, partitë, por partia që fiton zgjedhjet shkon qeveris dhe në momentin që humbet zgjedhjet nuk kthehet më i njëjti ekip në parti dhe bëhet qarkullimi i elitave.
SALI BERISHA: Normalisht kjo është. Qarkullojnë elitat. Kjo është e drejtë dhe normalisht qarkullimi i elitave është një moment ripërtëritës për partitë, për vizionin e saj, kusht.
LUTFI DERVISHI: Një temë shumë e diskutuar është reforma në drejtësi: Motoja e z. Rama gjatë dy viteve të fundit ka qenë se: opozita ka frikë nga vettingu, ndërsa Partia Demokratike ka qëndrimin se reforma është instrument që kryeministri të kapë Drejtësinë. A prodhon sistemi instrumente që ruajnë drejtësinë nga abuzimi ekzekutivit?
SALI BERISHA: Ky sistem?! Nuk mund ta them. Synon atë. Do të shihet sepse një pjesë e ligjeve janë rrëzuar në gjykatën kushtetuese dhe janë për t’u amenduar.
LUTFI DERVISHI: Ju thoni se kryeministri tenton të kapë sistemin. A vlen e njëjta gjë, nëse kryeministër pas 25 qershorit bëhet Lulzim Basha?
SALI BERISHA: Absolutisht njëlloj dhe e kam deklaruar në dhjetra herë. Marrim historinë e Shqipërisë. A ka kapur histori më të kapur në historinë e këtij vendi se sa në vitin ’98-’99 kur dy anëtarë të kryesisë së PS-së kryesonin dy gjykata? Dhe nuk është se ishte hataja për opozitën. Po për vendin është problemi. Për mua, ajo që kam thënë për kryeministrin është e barazvlefshme për çdo person tjetër. Kjo reformë duhet të kompletohet me transparencë të madhe. Ky është problem i transparencës. Tani transparenca nuk është një fjalë goje, është një problem jo i thjeshtë. Ju e patë që nga Avokati i Popullit dhe OMN-ja u dërgua me klerencë të pastër personin, anëtarë i PS-së. çka do të thotë se i shpëtoi procesit të transparencës.
LUTFI DERVISHI: Janë disa filtra dhe është komisioni parlamentar që…
SALI BERISHA: Po, filtra janë, po në fakt atë e kapi qytetari dixhital, nuk qe komisioni, nuk qenë kolegët e mi, por qe qytetari dixhital që më njoftoi se zonja filan është anëtare e…
LUTFI DERVISHI: Meqë dolët te qytetari dixhital. Nuk është e udhës që shumë denoncime të këtij qytetari dixhitali t’ia adresoni në institucione dhe jo vetëm në botën virtuale?
SALI BERISHA: Unë, po t’i vesh re, në shumicën e rasteve i bëj thirrje prokurorisë të hetojë. Dhe prokuroria në çdo rast nuk ka asnjë pengesë të nis kryesisht hetimin. Kjo është… se mua pastaj i bie të mbaj një institut të veçantë, të përgatis dosje çdo ditë për të dërguar dosjet..Prokuroria ka raste që i marrin, i shqyrtojnë. Institucionet janë të lira t’i marrin, t’i verifikojnë. Nuk janë 100% të vërteta ato, por në mënyrë absolute mbi 95% janë totalisht të vërteta.
LUTFI DERVISHI: Ju thatë se kjo është fushatë e pazakontë, edhe për faktin se po bashkëqeverisin. A keni ju një vlerësim për qeverinë poli-teknike?
SALI BERISHA: Jo, nuk është një qeverisje politeknike…
LUTFI DERVISHI:..është qeveri e plotë?
SALI BERISHA: Jo, kjo është një qeveri në të cilën Edi Rama u konsiderua nga opozita dhe komuniteti ndërkombëtar si një rrezik madhor për zgjedhjet dhe u vendos që të bëhej një masë lehtësuese për t’i hequr përdorimin si parti-shtet të institucioneve shtetërore.
LUTFI DERVISHI: A është ky model i mirë për çdo zgjedhje, që Shqipëria për disa mandate në prag zgjedhjesh të ftojë opozitën në institucione kyç.
SALI BERISHA: Greqia me kushtetutë në institucione kyç e bën me 3-4 ministra. Greqia, e cila ka qenë një vend me probleme në të shkuarën e saj, ka sot një stabilitet dhe një Kushtetutë, me institucione dhe mekanizma të cilat parandalojnë dhe zgjidhin kriza. Për shembull po marr qeverinë teknike. Qeveria teknike është një praktikë italiane, e suksesshme, jo e pasuksesshme. Për shembull në Itali kryeministri humbi votëbesimin. Forcat politike që të gjitha nuk ishin të gatshme të shkonin në zgjedhje. Po nëse forcat politike nuk janë të gatshme të shkojnë në zgjedhje praktika italiane krijon një qeveri teknike ose një qeveri të mbështetur nga shumica, e cila kryen një, dy, tre detyra. Greqia emëron me kushtetutë në këto raste, jo si këto, se ata ministrat i zëvendëson automatikisht. Por po të ndodh që nuk krijon dot qeveri, i jep presidenti mandatin e kryeministrit kryetarit të këshillit kushtetues. Kryetari i këshillit kushtetues, një gjykatës apo një jurist i shquar udhëheq qeverinë për 3 muaj deri në zgjedhje.
LUTFI DERVISHI: Meqë jemi te kalkulimet qeveritare. Ju jeni një politikanë që jeni shprehur të paktën që në 1992 se nuk i besoni sondazheve. Sondazhet deri tani nuk i japin asnjë force politike shansin për të krijuar 71 mandate. Në vështrimin tuaj PD ndjehet komode duke bërë aleancë me LSI, PDIU apo diçka të ngjashme apo një koalicion të madh për të vazhduar reformat kushtetuese, për të hapur negociatat me BE-në?
SALI BERISHA: Po më pyete mua çfarë thonë sondazhet e mia, sondazhet e mia thonë se PD fiton zgjedhjet, ndjesitë e mia.
LUTFI DERVISHI: Nuk kam dëgjuar asnjë kryetar të partive të mëdha që në fushatë të thotë do të humbasë…
SALI BERISHA: Jo, nuk është problemi këtu. Problemi është se unë shoh Edi Ramën që kalon nga sheshi në shesh si fantazmë e Nastradinit. Nuk përmend dot më asnjë nga premtimet. Ka një frazë standarde “shumë kemi bërë, por s’po harxhojë kohë që t’i përmend”. Absolutisht s’përmend dot asnjë, se nuk ka bërë, se nuk tregon dot një kilometër rrugë, një shkollë të re dhe asgjë…
LUTFI DERVISHI: Rama thotë “kemi bërë reformën territoriale, kemi formalizuar ekonominë, pagesat e energjisë, reformën në drejtësi”…
SALI BERISHA: Ka arrestuar 22 mijë vetë për energjinë elektrike, duke shndërruar në rast unik në botë çështjen civile në çështje penale. E gjithë bota mund ta bënte atë, por vendet e lira dhe vendet demokratike një seri çështjesh i lënë civile dhe i lënë pikërisht për të mos ushtruar dhunën shtetërore ndaj qytetarëve. Se dhe ato dinë. Një seri çështjesh të tjera i kanë penale. Kurse ky kaloi çështjen civile në çështje penale dhe vuri pas hekurave 22 mijë qytetarë, shumica e tyre njerëz të varfër dhe të pamundur. Ndërkohë që nuk ka vënë pas hekurave as 50 kanabistë që mbushën Shqipërinë me kanabis. Përkundrazi aty ka ikonën e kanabizimit, që është drejtori i përgjithshëm i policisë. S’ka lëvizur.
LUTFI DERVISHI: Tani është ministri i PD-së.
SALI BERISHA: Jo, nuk është kompetencë e ministrit…
LUTFI DERVISHI: Policia është e ndarë, por është në ministri…
SALI BERISHA: Dhe çfarë po bën?! Ai po i mban iso krimit…
LUTFI DERVISHI: Ju po thoni për ministrin apo drejtorin e përgjithshëm të policisë?
SALI BERISHA: Unë po flas për drejtorin e policisë… Ministri po përpiqet që ai insitucion që u lëshua si lukuni…
LUTFI DERVISHI: Në mënyrë paradoksale kur ishte ministër Xhafaj kapi…
SALI BERISHA: Ai institucion, policia e shtetit, policia kanabiste u lëshua si lukuni të marr pjesë në zgjedhje dhe ministri e ka frenuar në një mënyrë. Unë kam raporte, po janë të pakta. Nuk është ministri që lufton bandat. Për bandat dhe rendin është drejtori i përgjithshëm i policisë, që absolutisht nuk ka ndërmend. A i ke parasysh ti skenat se si e përcolli Saimir Tahirin, drejtori vet?! Sepse në duart e tij ishte një lolo.
LUTFI DERVISHI: Në parlamentin e ardhshëm, do të jetë z. Berisha dhe z. Basha. Ndiheni më komod duke qenë deputet i shumicës qeverisëse apo adrenalina është më e lartë si deputet opozite?
SALI BERISHA: Unë ndjehem shumë herë më komod me fitoren e PD-së. Natyrisht i vendosur të pranoj verdiktin e sovranit, por ndjehem shumë më komod dhe i sigurt se PD do të fitoj zgjedhjet dhe do udhëheq vendin në një program, gjykoj unë, jashtëzakonisht të rëndësishëm sepse në këto katër vite, kur mendon që katër vite për herë të parë sot shqiptarët, sipas INSTAT, në 27 vjet, pas një mandati kanë rroga më të ulëta se sa në fillim të mandatit sepse inflacioni bën punën e tij, kjo është dramatike. Dhe një njeri që flet nga mëngjes deri në darkë se ekonomia u rrit, se s’ka më mirë nga sa jemi, se kjo e ajo, dhe nuk thotë një fjalë pse u ulën rrogat, pse ikën investitorët, pse nuk erdhi në 4 vite një investitor serioz në Shqipëri. Nuk thotë një fjalë ku shkuan 3.2 miliard euro që në zërin e buxhetit figurojnë investime ndër kohë kur nuk ke. Nuk u tregon shqiptarëve as Lungomaren e Vlorës 3 km të përfunduar. Nuk përfundove dot rrugën Lushnjë-Berat, e cila për hir të së vërtetës nuk kërkonte më shumë se 4 muaj punë.
LUTFI DERVISHI: Z. Rama e ka një përgjigje për këto dhe thotë që pa një drejtësi, pa një gjyqësor nuk vinë investimet e huaja, nuk bëhet vendi.
