Në rrugët dhe pikat kufitare ku mund të lëvizin grupe migratore siriane, drejt vendeve të Europës, ditët e fundit policia shqiptare ka vendosur masa përforcuese. Drejtori i Përgjithshëm i kufirit në Policinë e Shtetit, Genc Merepeza, thotë se efektivët e policisë kufitare do të asistohen edhe nga një grup i policisë italiane.
Në rast të flukseve të larta migratore, Merepeza nuk përjashton mundësinë e aktivizimit të ushtrisë, në mënyrë që kufiri të jetë nën kontroll.
Aktualisht situata në pikat kufitare me Greqinë është e qetë, pavarësisht se ditët e fundit në Konicë dhe Kallpac 27 km larg Kakavijës kanë mbërritur disa grupe emigrantësh. Shqipëria konsiderohet si rrugë e mundshme e kalimit të refugjatëve që gjenden në Greqi. Burime të policisë bëjnë me dije se vendi ynë mund të akomodojë deri në 2 mijë refugjatë në rast nevoje.
Intervista e plotë me Drejtorin e Përgjithshëm të kufirit në Policinë e Shtetit, Genc Merepeza.
Merepeza cila është situata aktuale në kufirin me Greqinë për sa i përket emigrantëve sirianë?
– Mund tju them që policia e shtetit e ndjek në vazhdimësi situatën në kufirin me Greqinë duke informuar në çdo kohë nga baza në qendër të gjithë lëvizjen e fluksit migrator. Gjatë gjithë kësaj jave kemi patur një situatë të qetë, shërbimet e policisë kufitare dhe të Policisë së Shtetit që janë të dislokuara në afërsi të vijës së kufirit me Greqinë, ndjekin në çdo çast këtë situatë dhe mund të themi që situata është e qetë. Nuk ka pasur asnjë tentativë për të lëvizur grupe të mëdha emigrantësh drejt Shqipërisë.
Para dy ditësh në Konicë janë vendosur 160 emigrantë sirianë, përse këta emigrantë janë vendosur vetëm në pjesën e Konicës? A ka emigrantë që janë të vendosur në kufi me Kakavijën?
Nëse do të flasim për shpërndarjen e emigrantëve në territorin grek, mund të them që kjo shpërndarje e emigrantëve nuk është vetëm në Konicë, ka pothuajse në të gjithë territorin grek, ka në Grebena, ka në Konicë, ka në afërsi të Janinës, ka në Larisë, ka në Idomeni, në Pire. Pra ato janë të shpërndarë në të gjithë territorin grek, në të gjitha hapësirat e mundshme që autoritetet greke kanë për t’i sistemuar këta emigrantë, duke patur parasysh dhe mbylljen e kufirit me Maqedoninë dhe nuk ka rrugëdalje.
U fol që trafikantë të ndryshëm dhe grupe shqiptare mund të marrin nisma për të dërguar sirianët qoftë në kufirin tokësor nëpërmjet Malit të Zi drejt vëndeve të BE, qoftë në kufij detar.
Ky është një lajm që unë e kam lexuar përmes mediave, nuk është diçka që vjen nga burime policore që janë aktivizuar grupe trafikantësh. Unë mund t’iu them që deri në këtë moment nuk kemi asnjë tentativë të grupeve të organizuara të trafikimit të qenieve njerëzore që të marrin njerëz për t’i kaluar nëpërmjet Shqipërisë në drejtim të vendeve të tjera të BE.
Çfarë po bëhet për të parandaluar, sepse shqetësimi i italianëve është riaktivizimi i linjës së skafeve nëpërmjet bregdetit, ndërkohë po ashtu shqetësim është linja e Hanit të Hotit edhe kufirit tjetër me Malin e Zi.
Unë mund të them se Policia e Shtetit, të gjitha autoritetet dhe agjencitë ligjzbatuese janë në krye të detyrës për të parandaluar çdo veprim antiligjor që do të bëhet nëpërmjet kufijve të Republikës së Shqipërisë.
Plani i masave të ministrisë në bashkëpunim me autoritetet italiane çfarë parashikon?
Kjo është një shkëmbim i ndërsjellë eksperiencash që ne do të kemi me palën italiane, për të menaxhuar një fluks të mundshëm të migracionit që vjen nga Greqia. Nuk flitet për vendosje shërbimesh në kufi, thjeshtë do të kemi një asistencë të vazhdueshme dhe do të kemi një menaxhim më të mirë të një situate hipotetike që mund të na ndodhë në kufi.
Çfarë do të thotë menaxhim më i mirë? Do të thotë që do të vijnë efektivë policorë italianë?
Duhet të kemi parasysh që autoritetet italiane kanë një eksperiencë në menaxhimin e flukseve të mëdha migratore. Të gjithë e kemi ndjekur në media se si kanë menaxhuar në Lampedusa dhe në pjesën tjetër të Italisë jugore, dhe ne thjeshtë do të marrim eksperiencën e tyre për të menaxhuar një fluks.
Kanë mbërritur në momentin që flasim?
Jo nuk kanë mbërritur
Kur pritet?
Kjo është në varësi të bisedimeve që do të bëhen nga autoritetet vendimmarrëse.
Mendoni se i ka Policia e Shtetit të gjitha kapacitetet për të mbikqyrur kufirin e gjelbër?
Policia e shtetit është në punë për të mbikqyrur kufirin e gjelbër dhe kufirin blu. Ne nuk e kemi për herë të parë përballjen me flukse të tilla migratore, kemi patur në vazhdimësi vitet e fundit flukse të tilla, që kanë hyrë në Shqipëri në grupe që mund të kenë shkuar dhe në 80 veta. Kështu që duke patur parasysh mënyrën dhe rrugët që ndjekin këto grupe migratore, ne kemi përforcuar shërbimet kemi vendosur mjetet dhe pajisjet që kemi për mbikqyrjen e kufirit për të identifikuar këto grupe.
Sa shërbime janë të aktivizuara nga policia shqiptare dhe ku? Cilat janë zonat e “nxehta”?
Ne shërbimin e kemi të organizuar përgjatë gjithë perimetrit të kufirit shtetëror, ne nuk kontrollojmë një segment dhe lëmë një tjetër. Kuptohet shërbimet tona vendosen në drejtimet më të nxehta që ne kemi. Janë rrugët tradicionale që mund të ndjekin emigrantët për të hyrë në territorin e Republikës së Shqipërisë, si dhe për të kontolluar akset rrugore të cilat do të jenë të përdorshme pastaj nga këto grupe, për të kaluar nëpërmjet territorit shqiptar.
Po në kufirin detar ka masa shtesë?
Masat janë në të gjithë perimetrin e kufirit, nuk flitet që ne do të përforcojmë një drejtim të kufirit duke lënë drejtimet e tjera, sepse puna e Policisë së Shtetit dhe policisë kufitare bazohet në mbikqyrjen e kufirit, kontrollin e tij, për të luftuar paligjshmërinë në kufi.
Në rast se do të kemi një rritje të numrit të personave që do të tentojnë të largohen, do të futen në Shqipëri, a po e merrni në konsideratë përfshirjen e ushtrisë në bashkëpunim me Ministrinë e Mbrojtjes?
Unë mund t’iu them që zgjidhja për një fluks të mundshëm migrator nuk do të jetë zgjidhje shqiptare, do të jetë zgjidhje më e gjerë, sepse ne do të veprojmë në partneritet me vendet e BE, duke patur parasysh se nëse ato do të kërkojnë një qasje tjetër në lidhje me migracionin në Shqipëri dhe ne do të marrim ato masa të cilat do të na rekomandohen nga vendet e BE. Ne në kufi do të marrim masa për të mbikqyrur dhe për të kontrolluar kufirin me ato kapacitete njerëzore dhe teknike që kemi në përdorim dhe në raste që është e përballueshme nga policia kufitare, do të aktivizohen të gjithë përfaqësues të autoritetetve shtetërore që veprojnë, duke mos përfshirë vetëm ushtrinë, por edhe Ministria e Shëndetësisë, pushteti lokal, organizma joqeveritare, si dhe organizma ndërkombëtare që janë të atashuara në Shqipëri.
Sa emigrantë mund të presë sot Shqipëria, sa është kapaciteti?
Ne nuk kemi kapacitete të mëdha për të pritur emigrantë, kapacitetet tona janë të limituara, nuk mund të flasim për një numër të saktë, po të jap atë numër që ne kemi aktualisht që menaxhojmë, do të jetë një numër që nuk do të kënaqë askënd, kështu që të jemi më fleksibël në numrin që mund të presë Shqipëria. Kjo varet nga numri i personave që mund të tentojnë dhe nga masat që do të merren pastaj për t’i asistuar këta njerëz.
A keni një mesazh për emigrantët sirianë që duan të kalojnë nëpërmjet kufirit shqiptar?
Shqipëria nuk është vend tranziti për emigrantët.
Që do të thotë?
Që do të thotë se Shqipëria nuk është si koridori maqedonas.
Përse?
Sepse nëse nuk do të ketë një portë dalje, ata emigrantë që do të vijnë mund të vijnë për të kërkuar mbrojtje humanitare në Shqipëri, por jo që të jenë tranzit për në vendet e tjera.
Sa efektivë italianë mund të asistojnë në Shqipëri, sa mund të jetë numri më i madh, 100 persona? Është përfolur në media për 100 ushtarë apo 200 persona të cilët mund të asistojnë.
Nuk e di ku i keni gjetur këto shifra.
Në mediat ndërkombëtare.
Unë isha prezent në Itali dhe nuk u fol për një numër të caktuar personash që do të vijnë në Shqipëri, thjeshtë u tha që do të shkëmbehet eksperiencë, do të shkëmbehet informacion dhe do të asistohet policia shqiptare për të menaxhuar sa më mirë një fluks të mundshëm emigrantësh.
Qoftë dhe financiarisht?
Çdo gjë ka koston e vet.
Tv Klan
