De Biazi ndodhet sërish në fokus të mediave italiane. Në një intervistë për portalin e njohur “Tuttomercatoweb”, trajneri i Kombëtares shqiptare të futbollit foli për lëvizjet e fundit në Serinë A dhe për kontratën e tij me kuqezinjtë.
Manajt te skuadra e Interit dhe zërat e përhapur në media për trajnerin e ardhshëm të Italisë.
Për sa i përket sulmuesit të zikaltërve, tekniku u shpreh se Manaj nuk po gjen hapësirat e duhura te Interi dhe kjo nuk shkon në favorin e tij
“Për fat të keq ka pak mundësi, veçse kur luan me të rinjtë gjatë së cilës shfaq aftësitë e tij reale. Te skuadra e parë për fat të keq është pasiv dhe kjo nuk i bën mirë. Një djalë si ai, duke u huazuar, do t’i kishte dhuruar më shumë mundësi për të luajtur.
Stërvitja me lojtarët e Interit e ndihmon, por kjo nuk është e gjitha që mund t’i shërbejë një si Manaj”,tha ai.
Duke folur për Milanin, trajneri tha se “ekipi ka ekuilibrin e tij dhe Mihajloviç u tregua i zoti të merrte më të mirën ndaj lojtarëve të tij”.
De Biazi u ndal edhe te Juventusi dhe Interi. Te Alegri ka vlerësuar anën menaxheriale, ndërsa te Interi theksoi vështirësitë që has skuadra në gjetjen e golit.
Lidhur me kalimin e mundshëm të Kontes te skuadra e Çelsit, trajneri deklaroi se e sheh shumë mirë në drejtimin e kësaj skuadre.
Pyetjes se një vend do të lirohet në Kombëtaren italiane, De Biazi iu përgjigj duke thënë se “ka shumë kandidatë, nuk mendoj se jam njëri prej tyre. Kam një kontratë deri në fund të 2017-s me Kombëtaren shqiptare, por më gjeni një trajner italian që nuk do të donte të drejtonte Italinë”.
