Tifozi që gjeti vdekjen në shkallët e stadiumit të Vlorës është përcjellë dje në banesën e fundit. Ai përplasi kokën në rrethana ende të paqarta, pasi ra nga shkallët. Persona që e kanë parë skenën kanë akuzuar një efektiv policie për ngjarjen, i cili e ka shtyrë 40 vjeçarin Mikel Selmani.
Daja i tij, Xhelil Xhelilaj, kërkoi dje drejtësi. Sipas tij, nipi është shtyrë në shkallë teksa ka qenë me duar në xhepa.
Xhelil, a keni të dhëna për nipin tuaj në lidhje me rrethanat e vdekjes. Nëse ai është shtyrë nga një efektiv policie, apo ka rënë aksidentalisht?
Nipi im, Mikeli, nuk ka qenë as i dehur, siç pretendon ndonjëri, dhe as i pavëmendshëm, madje ka ftuar dhe të atin që të ndjekë Flamurtarin.
Ai e ndiqte prej shumë vitesh, s’ka lënë ndeshje pa vajtur, kështu që, kushdo që e nxjerr të pafajshëm atë njeri që bëri një krim, që nuk është parë ndonjëherë në skenat e futbollit shqiptar, duhet të gjykohet dhe të veprojë drejtësia.
Ju thoni se ka qenë ngjarje e qëllimshme?
Ai polici mund ta ketë shtyrë edhe pa dashje, por ky njeri duhet të mbajë përgjegjësinë që i takon. Pra ne kemi të dhëna se ai është shtyrë në momentin që ka pasur duart në xhepa dhe pa mendje. Nuk ka rrëshqitur vetë, në asnjë mënyrë! Nëse do të kishte rrëshqitur vetë, do të kishte marrë dhe dëmtime të tjera të trupit, ndërsa ai ka vetëm një goditje në kokë, në pjesën e parë të ballit dhe kaq. Me atë goditje ka gjetur vdekjen.
Ju e keni parë videon që ka qarkulluar për rrëzimin e tij?
Po, e kemi parë, madje disa herë, por videoja është disi e paqartë. Pasi videoja jep vetëm momentet pas rënies, nuk fikson asgjë para saj. Megjithatë, ne kërkojmë që të merren të gjitha provat dhe dëshmitarët. Të gjenden nga kamerat përreth se çfarë ka ndodhur. Të bëhet drejtësi, për të mos na çuar deri në veprimet e mëtejshme, që nuk i interesojnë askujt.
Ju keni shkuar edhe në Prokurori për të marrë të dhëna në lidhje me çfarë ka ndodhur. Çfarë ju thanë atje?
Në Prokurori na thanë që po vazhdojnë hetimet, por ata kërkojnë që të shkojnë edhe ata që e kanë parë këtë skenë për të dëshmuar. Po
ashtu, ne kemi pretendimet tona se atij nuk i është dhënë ndihma e menjëhershme, si dhe është transportuar me furgon policie, me
vonesë, për në spital. Nuk ka pasur në stadium ambulancë. Nëse do të ishte transportuar në kohë dhe me ambulancë, ndoshta do t’i kishin shpëtuar jetën Mikelit.
Mikeli kishte shkuar vetëm në stadium?
E çuditshme! Ai asnjëherë nuk shkonte vetëm, por me shokë. Ndërsa dje kishte shkuar vetëm, pasi kishte drekuar me dy shokë të tij. Ai i ndiqte vazhdimisht ndeshjet, sepse një portier i Flamurtarit është nipi i tij. Në fund dua të them se Policia dhe Prokuroria duhet të zbardhin ngjarjen dhe të mos fshijnë faktet, sepse ne do t’i gjejmë vetë faktet, madje dhe emrin se kush e shtyu djalin tonë në kohën që po ikte nga shkallët, i qetë dhe me duar në xhepa./ Panorama.al
