Kreu i inteligjencës ushtarake të Ukrainës thotë se presidenti rus Vladimir Putin mund të jetë në kërkim të ndarjes së Ukrainës në dy pjesë – si Koreja e Veriut dhe ajo e Jugut.
Gjenerali Kyrylo Budanov, kreu i Agjencisë së Inteligjencës Mbrojtëse të Ukrainës, tha se operacionet e Rusisë rreth Kievit kishin dështuar dhe tani ishte e pamundur që ushtria ruse të rrëzonte qeverinë ukrainase. Lufta e Putinit tani ishte e fokusuar në jug dhe në lindje të vendit, tha ai.
“Ka arsye për të besuar se ai po shqyrton një skenar ‘korean’ për Ukrainën. Kjo do të thotë, se forcat ruse do të përpiqen të vendosin një vijë ndarëse midis rajoneve të papushtuara dhe të pushtuara të vendit tonë. Në fakt, është një përpjekje për të krijuar Korenë e Veriut dhe të Jugut në Ukrainë”.
Budanov tha se Rusia mbeti e vendosur për të krijuar një korridor tokësor nga kufiri rus në Krime dhe tha se ai priste të shihte një përpjekje për të bashkuar territoret e pushtuara nga Rusia në një entitet të vetëm.
“Ne po shohim tashmë përpjekje për të krijuar autoritete “paralele” në territoret e pushtuara dhe për të detyruar njerëzit të heqin dorë nga monedha ukrainase,” tha Budanov, duke shtuar se ai priste që ukrainasit t’i rezistonin përpjekjeve politike të Rusisë./Opinion.al
