Nga 6 vendet e Ballkanit Perëndimor, Shqipëria dhe Kosova pritet të kenë rritjen më të lartë ekonomike për vitin 2023.
Këtë tregojnë parashikimet e Institutit të Vjenës për studime ekonomike ndërkombëtare. Sipas ekspertëve të Vjenës, prodhimi i brendshëm bruto në Shqipëri do të zgjerohet me 3.3%.
Për periudhën 2021-2025, këto janë ritmet më të ulëta të rritjes ekonomike.
Megjithatë Instituti i Vjenës konstaton se për këtë vit recesioni i plotë do të shmanget, pasi shumica e vendeve po e kalojnë tronditjen e shkaktuar nga lufta në Ukrainë.
“Pavarësisht inflacionit të lartë që po rëndon mbi familjet dhe bizneset, treguesit e tjerë po rimëkëmben”.
Megjithatë ka ende disa rreziqe.
“Së pari, shtrëngimi drastik i politikës monetare mund të çojë në ulje të ritmeve të rritjes ekonomike. Së dyti, ekziston ende mundësia e një përshkallëzimi ushtarak të luftës në Ukrainë”.
Sa i përket inflacionit, nga vendet e rajonit Shqipëria sipas ekspertëve të Vjenës do të ketë rritjen më të ulët të cmimeve për vitin 2023, me 4%. Për dy vitet e ardhshme parashikimet tregojnë për një rënie të mëtejshme të çmimeve./ Tv Klan
