Mbi 1700 objekte e kompani shtetërore do të dalin në treg për privatizim gjatë vitit 2016, mes të cilave edhe INSIG.
Kompania e konsulencës e kontraktuar për të bërë vlerësimin ka mbaruar punë dhe tashmë është vendosur një çmim dysheme, 15 milionë euro.
Duke sqaruar procedurat për privatizimin e sektorëve strategjikë, burime nga Ministria e Ekonomisë shprehen se po kryhen procedurat për tre shoqëri kryesore, INSIG, si dhe dy paketat e mbetura të shtetit tek kompania ARMO dhe Albtelecom.
Vlerësimi i kompanisë së INSIG-ut është 15 milionë euro, çka do të thotë se do të jetë dhe vlera fillestare e tenderit të hapur për shitjen e tij.
INSIG është një ndër kompanitë e pakta që kanë mbetur ende me pronësi publike. Në të kaluarën, qeveria shqiptare ka tentuar disa herë ta shesë kompaninë, por pa sukses.
Privatizimi i kompanisë INSIG filloi si procedurë që vitin e kaluar, proces i cili u krye nga një kompani konsulence ndërkombëtare.
Sipas burimeve nga ministria, dosja është dërguar në Ministrinë e Financave, e cila do të shpallë publikimin për hapjen e tenderit.
Forma e tenderit është e hapur. Lidhur me kompaninë shtetërore të naftës Albpetrol, ministria shpjegon se po kryhet studimi për mënyrën e privatizimit.
Albpetrol-i është kompani 100% shtetërore, e cila administron dhe ka në pronësi të saj pasuri shumë të rëndësishme kombëtare, siç janë karburantet dhe gazi.
Mendohet të bëhet një studim i hollësishëm, gjë që ka nisur që një vit më parë në bashkëpunim edhe me ministrinë e Industrisë dhe Energjetikes si dhe specialistë të fushave.
Qeveria do të bëjë më parë ristrukturimin e Albpetrol në mënyrë që privatizimi t’i shërbejë sa më mirë rritjes së eficencës ekonomike, për ta bërë atë sa më atraktive në interes të publikut dhe shtetit shqiptar.
Deri tani nuk është vendosur ende nëse do të bëhet privatizimi përmes shitjes së 100% të aksioneve, apo formave të tjera pasi po shqyrtohen edhe mundësi të tjera si bashkëpunimi i tipit “Joint Venture’ apo dhënia me koncesion për një afat të caktuar.
Edhe paketat pranë ARMO-s dhe Albtelecom, konkretisht 15% dhe 16%, para se të shiten, do të rivlerësohen. Vlerësimi i këtyre paketave do të bëhet me ekspertë ose kompani konsulente të njohura ndërkombëtare, ashtu siç e kërkon ligji, pasi janë sektorë strategjikë.
Tregu i sotëm do të japë një vlerë shumë të mirë në favor të shtetit nga këto aksione.
Pjesa tjetër e privatizimeve ka të bëjë me asete të ndërmarrjeve apo pasuri të ndryshme shtetërore që nuk janë pjesë e paketës strategjike.
Këto janë objekte të mbetura nga ish-ndërmarrje, pjesë të ndryshme të këtyre ndërmarrjeve apo shoqërive publike, si reparte ushtarake, objekte ushtarake apo të Ministrisë së Brendshme, Bujqësisë, Arsimit etj., që kanë dalë jashtë funksionit të tyre. /SHQIP/
