Gjatë konferencës së përbashkët me homologun maqedonas, kryeministri Rama është pyetur për influencën ruse në Shqipëri. Rama tha se nuk është sekret se Rusia është kundërshtare me Bashkimin Europian dhe çdo tentativë e Ballkanit Perëndimor për t’u anëtarësuar në BE nuk shihet me sy të mirë nga rusët.
“Rusia nuk është një vend tifoz i Bashkimit Europian, i zgjerimit të Bashkimit Europian dhe natyrshëm s’mund të ketë pritshmëri evropiane për asnjë prej vendeve të Ballkanit Perëndimor, kjo nuk është sekret, dihet. Ne kemi një axhendë kombëtare, kryefjala e së cilës është të bashkohemi me familjen evropiane. Sa herë që kjo axhendë cenohet, aq herë kush nuk është tifoz i Europës, i integrimit të plotë Europian të Shqipërisë dhe Ballkanit Perëndimor, sheh një oportunitet. Kaq”, ka thënë Edi Rama.
Megjithëse nuk është përgjigjur direkt, kryeministri Rama në këtë mënyrë ka pranuar se ka një influencë ruse në Shqipëri. Një gjë e tillë u raportua edhe nga Shefi i Shërbimit Informativ Shtetëror, Helidon Bendo, në mbledhjen me dyer të mbyllura të Komisionit të Sigurisë./Opinion.al
