Sipas raportit të INSTAT, inflacioni, që mat ndryshimin vjetor të indeksit të çmimeve të konsumit, në muajin maj 2025 është në 2.2%, krahasuar me muajin prill që ishte 2.3%.
“Rritja vjetore e çmimeve në muajin maj është ndikuar kryesisht nga grupi “Ushqime dhe pije joalkoolike” me +1.11 pikë përqindje, pasuar nga grupi “Qira, ujë, lëndë djegëse dhe energji” me +0.30 pikë përqindje”, thuhet në raportin e INSTAT.
Gjithashtu sipas INSTAT ndikuan edhe çmimet e pajisjeve shtëpiake, mobiljeve, pijeve alkolike, argëtimit, kulturës etj.
“Çmimet e grupit “Mobilje, pajisje shtëpie dhe mirëmbajtje e shtëpisë” me +0.24 pikë përqindje, çmimet e grupit “Pije alkoolike dhe duhan” ndikuan me +0.18 pikë përqindje, çmimet e grupit “Argëtim dhe kulturë” me +0.14 pikë përqindje, çmimet e grupit “Hotele, kafene dhe restorante” me +0.10 pikë përqindje, çmimet e grupit “Veshje dhe këpucë” me +0.09 pikë përqindje, çmimet e grupit “Mallra dhe shërbime të ndryshme” me +0.06 pikë përqindje, çmimet e grupit “Komunikimi” me +0.05 pikë përqindje, çmimet e grupit “Shërbimi arsimor” me +0.03 pikë përqindje, çmimet e grupit “Shëndeti” me +0.02 pikë përqindje dhe çmimet e grupit “Transporti” me -0.07 pikë përqindje”, thuhet në raportin e INSTAT.
Krahasuar me muajin maj 2024, rritja më e madhe e çmimeve vërehet në grupin “Argëtim dhe kulturë” me 6.3%, pasuar nga grupet “Pije alkoolike dhe duhan” me 3.7% ndërsa “Ushqime dhe pije joalkoolike” dhe “Mobilje, pajisje shtëpie dhe mirëmbajtje e shtëpisë” me 3.2% secili.
“Brenda grupit të ushqimeve çmimet e nëngrupit “vajra dhe yndyrna” patën një rritje me 7.2 %, pasuar nga nëngrupet “zarzavate përfshirë patatet” me 6.8 %, “qumësht, djathë dhe vezë” me 4.8 %, “mish” me 3.8 %, “bukë dhe drithëra” me 0.9 %, etj”, thuhet në raportin e INSTAT.
Nga ana tjetër çmimet e grupit “Transporti” shënuan ulje me 1.2%.
Indeksi i Çmimeve të Konsumit është matësi zyrtar i inflacionit në Shqipëri.
Indeksi mat ndryshimet relative të çmimeve të mallrave dhe shërbimeve të përdorura nga familjet për konsum vetjak dhe llogaritet duke përdorur strukturën e konsumit final të familjeve shqiptare./tvklan.al
