Mungesa e fuqisë punëtore në vendin tonë ka prekur edhe industrinë minerare, teksa interesi i të rinjve për këto degë studimi është në ulje.
Dekani i Fakultetit të Gjeologjisë dhe minierave në Tiranë pohon se mungojnë specialistët e rinj dhe se këtë vit akademik ka pasur vetëm 6 regjistrime të reja, në vitin e parë Bachelor në degën e inxhinierisë së burimeve minerare.
“Ka pak interes”, tha Shkëlqim Daja, dekan i Fakultetit të Gjeologjise dhe Minierave.
Problemet me fuqinë punëtore në miniera e evidenton edhe një raport i inspektoratit qendror për vitin 2024. Sipas tij, fenomeni ka prekur pothuajse në të gjitha subjektet minerare.
“Kjo ka sjellë mbylljen e disa subjekteve dhe reduktim të aktivitetit tek pjesa tjetër. Punëmarrësit janë të detyruar të punësojnë punonjës me moshë të madhe dhe pa eksperiencë pune në miniera, gjë që rrit riskun në punë”, tha Daja.
Mungesa e specialistëve të rinj nga universiteti politeknik, sjell një perspektivë të vështirë për industrinë minerare, e cila ka nevojë për fuqi punëtore, përfshirë edhe drejtuesit teknikë.
“Ka vendet pune, janë rreth 600 subjekte në këtë industri. Shumë subjekte kërkojnë punonjës”, tha Daja.
Shpallja e Inxhinierisë së Burimeve Minerare si program prioritar që u jep studentëve bursë sa paga minimale nuk ka dhënë fryte, ndërsa kërkohet një fushatë ndërgjegjësimi për mundësitë që ofron kjo industri.
