Ministrja e Arsimit, Besa Shahini ka reaguar në lidhje me incidentin e shënuar në shkollën “Janaq Kilica” në Fier, ku disa nxënës shfaqën shenja helmimi dhe u transportuan për në spital.
Po ashtu, drejtoresha e Zyrës Arsimore në Fier, Yllka Beci tha se një nga nxënëset që shfaqi shenja helmimi “është shtatzënë”.
Ndërkohë, ministrja shprehet në rrjetet sociale se ngjarja është e manipuluar politikisht me qëllimin për të shkaktuar kaos dhe për të dëmtuar “punën e mirë të bërë në shkollë prej shumë vitesh”.
Shahini thotë se ankesat për ndërhyrje politike në shkollë po hulumtohen me kujdes dhe do të merren masa për t’u siguruar se tensionet politike të stisura nga opozita jashtë-parlamentare të mos të ndikojnë në punën e shkollës.
Reagimi i plotë:
Sapo u dakordësuam me Kryetarin e Bashkisë Fier për të ndërhyrë edhe në godinën e vjetër të shkollës së mesme “Janaq Kilica”, që ta sjellim në gjendjen e godinës së re, pra në gjendjen të cilën meriton shkolla qendrore e Fierit.
Nuk do të lejojmë që ngjarje të manipuluara politikisht për të shkaktuar kaos të dëmtojnë punën e mirë që bëhet në atë shkollë prej shumë e shumë vitesh. Kemi shtuar oficerët e sigurisë dhe prezencën e psikologut në shkollë, në mënyrë që të mbështesim drejtoren e cila po bën një punë të mirë në organizimin e shkollës.
Ankesat për ndërhyrje politike në shkollë po i hulumtojmë me kujdes dhe do të marrim masa që të sigurohemi se tensionet politike të stisura nga opozita jashtë-parlamentare mos të ndikojnë punën e rëndësishme shkollore./ Opinion.al
