Kryetari i Partisë Mundësia, Agron Shehaj u bë aktor i një incidenti ditën e sotme në një KZAZ të Tiranës. Ai debatoi me disa numërues që tentuan t’i nxirrnin partisë së tij disa vota të pavlefshme.
Për emisionin “Opinion”, Shehaj tregoi prapaskenat e kësaj ngjarjeje dhe si ia doli që t’i nxirrte të vlefshme ato.
Agron Shehaj: Ndodhi që tentuan që disa nga votat e Partisë Mundësia me një pretekst që nuk kishin ngjyrë identike me fletët e tjera. Më thërriten te qendra e numërimit, u detyrova të ngrija zërin dhe pastaj u dorëzuan.
Blendi Fevziu: Pse me ngritje zëri zgjidhen zgjedhjet, apo me çështje ligjore? Pra kush bërtet më shumë e zgjidh?
Agron Shehaj: Do e provosh njëherë me ngritje zëri se çfarë të bësh.
Blendi Fevziu: Kush po kërkonte t’i nxirrte të pavlefshme votat?
Agron Shehaj: Numëruesit e asaj tavoline. Ishin të katërt, nuk mund të them se cila forcë politike kishte marrë iniciativën, por të katërta po mundoheshin të nxirrnin të pavlefshme votat e Partisë Mundësia.
