Prezenca e OSBE-së në Shqipëri ka reaguar lidhur me incidentet e raportuara ndaj gazetarëve gjatë procesit zgjedhor të 11 majit.
Në një deklaratë zyrtare, OSBE shpreh shqetësimin e saj për rastet e frikësimit dhe pengesave që gazetarët kanë hasur para, gjatë dhe pas zgjedhjeve.
“Ritheksojmë rëndësinë jetike të lirisë së medias si një gur themeli i demokracisë”, thuhet në deklaratë, ku theksohet gjithashtu angazhimi i OSBE-së për të mbështetur përpjekjet në mbrojtje të gazetarëve dhe për sigurimin e një mjedisi të sigurt dhe të hapur për median në Shqipëri.
Organizata shpreh gatishmërinë për të ndihmuar autoritetet shqiptare dhe aktorët relevantë në përmbushjen e angazhimeve ndërkombëtare në kuadër të OSBE-së, për të garantuar një hapësirë mediatike ku sundon liria e shprehjes dhe siguria e profesionistëve të medias.
Kujtojmë se, përveç pengesave sporadike gjatë procesit zgjedhor për të marrë informacion të plotë, gazetarët pas zgjedhjeve u përballën në një protestë të PD, e cila kundërshtonte rezultatin e 11 majit, me presion dhe kërcënim nga deputetët demokratë dhe mbështetësit e tyre që merrnin pjesë në tubim.
