Ish-kryeministri Sali Berisha, në një deklaratë për shtyp akuzoi kryebashkiakun Erion Veliaj se ka pasur një rol kryesor në dhënien e koncesionit të inceneratorit të Tiranës, ndërsa tani po kërkon të hiqet si viktimës.
Sipas Berishës, Veliaj është një ndër pronarët e këtij djegësi i cili ndryshoi strategjinë se si do të trajtoheshin mbetjet në Tiranë dhe ndikoi që kompania fantazmë të merrte një bonus në komisionin e dhënies së koncesioneve.
“Erion Veliaj ka mobilizuar këto kohë të gjitha potencialet mafioze mediatike dhe kërkon me cdo kusht të paraqitet ose si viktimë ose së pak si myshteri i Klodian Zotos dhe Mirel Mërtirit. Në këtë kuadër, burime shprehen se ai po bën presion të madh dhe në drejtësi. Theksoj se këto qëndrime përbëjnë vepër penale të re për të cilat ai do të bëhet përgjegjës deri më një krahas përgjegjësive të rënda ligjore dhe penale që mban si njeriu kryesor i djegësit të Tiranës.
Të pretendosh se je viktimë apo myshteri i Zotos dhe Mërtirit do të thotë të tallesh jo vetëm me veten, por me drejtësinë dhe mbarë publikun. Është Veliaj padroni i djegësit të Tiranës, i cili për të hapur dyert e aferës së shekullit ndryshoi strategjinë e trajtimit të mbetjeve nga riciklim në djegie me koncension.
Askush, as Zoto as Rama nuk mund të vendoste dhe t’i diktonte një vendim kryetarit të Bashkisë pa shkelje të Kushtetutës. Veliaj, përveç përmbysjes së strategjisë ka pasur rol për dhënien me koncesion privat të djegieve të mbetjeve të Tiranës, gjë që ndryshonte nga Fieri dhe Elbasani, që ishin prokurime.
Veliaj është autori, arkitekti i djegësit prej 128 mln euro, i cili duhej të ndërtohej i tëri me paratë e koncensionarit, por që më vonë u kalua se do paguhej nga taksapaguesit shqiptarë dhe në 30 vite do t’i paguanin kompanisë së Veliajt nga 680-750 milionë euro.
Janë përfaqësuesit e Veliajt në komisionin e dhënies së koncensioneve që kanë luajtur rol në dhënien e bonusit prej 8 pikësh një kompanie që nuk ekzistonte përvecse në kokën e Veliajt”, tha Berisha./Opinion.al
