Kryeministri Edi Rama ka folur lidhur me akuzat për korrupsion të publikuar në media për ish-zëvendëskryeministrin Arben Ahmetaj.
Rama tha në emisionin “Opinion” se nëse këto akuza rezultojnë të vërteta, Ahmetaj duhet të mbajë përgjegjësi personale dhe se ai nuk e ndihmon dot.
Ndër të tjera, kreu i qeverisë përsëriti edhe njëherë se PS nuk mbron asnjë zyrtar të përfshirë në korrupsion.
Çfarë po ndodh me Arben Ahmetajn? Çfarë raporti keni ju?
“Kur unë kam filluar luftën për reformën në drejtësi e besoja atë gjë dhe e kam ditur shumë mirë që do të thotë të hapësh rrugën që drejtësia të ketë në dorë armë dhe të godasi majtas dhe djathtas. e kam ditur e kam thënë dhe i qëndroj asaj. Kur numërohen këto raste mua nuk më vjen mirë se në aspektin njerëzor unë me këtë njerëz kam patur marrëdhënie. Por kjo është gjëja që kam kërkuar. Kush shkel aty ku nuk duhet përgjigjet, kjo është gjëja që kam kërkuar unë. Kam thënë gjithmonë se jemi një skuadër, kush gabon se i merr koka erë do i dali për zot vetë pastaj.. Ai ka qenë bashkëpunëtori im, kam punuar me të për një periudhë të gjatë. Nëse këto që dalin nëse janë të vërteta më vjen shumë keq, por nuk e ndihmoj dot. Kryeministri nuk mban përgjegjësi nëse ministri del nga shinat ose çmendet pas shpinës së tij, por kur gjëja merr formën e një akuze. Kjo është përgjegjësia morale. Jetojmë në një kohë kur përgjegjësia morale është përgjegjësi politike dhe personale ndaj opinionit publik për qëllimet e shpallura. Kush shkel ligjin përgjigjet para ligjit.
