Kryeministri Edi Rama në inaugurimin e Spitalit të Pediatrisë së Përgjithshme në QSUT tha se është materializuar edhe projekti i partneritetit të menaxhimit të spitaleve.
Gjatë fjalës së tij, Rama shprehet se ky investim është pjesë e modernizimit të shëndetësisë, duke përfshirë spitalet pediatrike dhe maternitetet rajonale në të gjithë vendin.
“Më vjen shumë mirë po ashtu që mjekëve dhe infermierëve ju japim mundësinë e një tjetër strukture ndërkohë që së shpejti me financimet e këtij viti do të realizojmë transformimin e strukturës së tretë të Pediatrisë Infektive.
Është viti me buxhetin më të lartë për shëndetësinë, 1 miliardë Euro, një buxhet i paimagjinueshëm më parë që do ta realizojmë me cilësi dhe duke rritur kapacitetet në të gjithë rrjetet e shërbimit shëndetësor të Republikës, por duke ndaluar këtu më vjen shumë mirë që ne ndërkohë jemi thuajse në përfundim të punës për të futur dhe një shërbim tjetër, një shërbim të ri falë një bashkëpunimi me një organizatë të njohur në fushën e mbështetjes së fëmijëve me miq izraelitë që do të sjellin këtë shërbim që është shkolla pranë pediatrisë që do t’ju japin mundësi fëmijëve të pediatrisë që të marrin mësim dhe të mos ngelin mbrapa me një program që i përshtatet gjendjes së tyre jooptimale shëndetësore.
Më vjen mirë që kemi materializuar edhe projektin e partneritetit të menaxhimt të spitaleve. Kanë ardhur menaxhërët nga Turqia në spitalin Memorial të Fierit dhe më pas do shpërndahen në spitale të tjera përshirë edhe QSUT që do të na japë një ndihëm të madhe në atë që është pika më e dobët sot në sistemin shëndetësor që është menaxhimi profesional. Këtu flasim për menaxhimin profesional të një sistemi të ri që bazohet tek autonomia spitalore”, shprehet Rama.
