Kreu i grupit parlamentar të Partisë Demokratike, Gazment Bardhi, ka akuzuar ashpër mazhorancën se po e zvarrit qëllimisht procesin parlamentar lidhur me kërkesën e SPAK për heqjen e imunitetit të Belinda Ballukut, duke e cilësuar kërkesën për shtyrje si “tallje me procesin” dhe përpjekje për të mbrojtur një të pandehur.
Sipas Bardhit, kërkesa e mazhorancës për një muaj kohë për shqyrtimin e materialeve nuk ka asnjë bazë ligjore dhe bie ndesh me praktikat e mëparshme të Kuvendit. Ai solli si shembull rastin e ish-zëvendëskryeministrit Arben Ahmetaj, për të cilin, sipas tij, kishte rreth 15 mijë faqe materiale dhe deputetëve iu lanë vetëm 48 orë kohë për shqyrtim.
“SPAK ka qenë i qartë se edhe çështja e Ballukut është urgjente, pasi ka vlerësuar se po intimidohen dëshmitarët. Një person që shkoi në prokurori dhe tregoi të vërtetën është intimiduar nga e pandehura Balluku. Nuk mund t’i japim kohë që të intimidojë të gjithë dëshmitarët”, deklaroi Bardhi.
Ai theksoi se Balluku nuk mund të ketë më shumë të drejta se çdo deputet tjetër, të cilëve në raste të ngjashme u janë dhënë vetëm 48 deri në 72 orë për shqyrtimin e materialeve. Sipas Bardhit, prokuroria ka vlerësuar se tri ditë janë të mjaftueshme për këtë proces, me një maksimum prej pesë ditësh, dhe ka kërkuar që procedura të përmbyllet sa më shpejt.
Sipas tij, mazhoranca po kërkon dy javë kohë vetëm për të hartuar raportin e Këshillit të Mandateve, çka do ta shtyjë shqyrtimin e çështjes deri në fund të muajit shkurt. “Me këto afate, deri në shkurt provave dhe dëshmitarëve do t’u jetë bërë dëm i pariparueshëm”, paralajmëroi Bardhi.
