Banorët e fshatit Verri në Fier kanë bllokuar këtë të enjte rrugën kombëtare Lushnjë – Fier, duke lënë për disa orë drejtuesit të bllokuar në autostradë.
Ata protestojnë kundër ndërtimit të impiantit të përpunimit të mbetjeve me djegie në tokat përreth zonës ku banojnë, prandaj kërcënojnë se nëse inceratori ndërtohet, do të marrin masa më ekstreme.
Disa ditë më parë kreu i Bashkisë së Fierit Armando Subashi, kishte publikuar në rrjetet sociale vendimin për tërheqjen e ndërtimit të kësaj vepre në këtë zonë, por protestuesit nuk e besojnë, pasi makineritë vazhdojnë të jenë në vendin ku kishte nisur puna për ngritjen e impiantit.
Banorët e Verrisë thonë se janë të frikësuar nga dëmi që mund të shkaktojnë në mjedis inceratori me djegie, dhe se përveç shëndetit ata nuk do të mund të mbjellin dot tokat.
