Presidenti Ilir Meta ka kthyer për rishqyrtim në Kuvend ligjin për “Për shërbimin përmbarimor gjyqësor privat”.
Në arsyetimin e bërë nga Presidenti për këtë vendim thuhet se është konstatuar se disa dispozita të veçanta të këtij ligji paraqesin paqartësi në formulimin e tyre.
“nuk janë në harmoni me legjislacionin aktual në fuqi; shkaqe këto të cilat mund të sjellin zbatim të gabuar në praktikë, apo keqinterpretim me pasojë cenimin e parimeve kushtetuese të sigurisë juridike, si dhe nismës dhe veprimtarisë së lirë ekonomike”, thekson presidenti.
Përpos kësaj, Presidenti vlerëson se në kushtet kur Shërbimi Përmbarimor Gjyqësor Privat është funksion publik i deleguar dhe paraqet fazën përfundimtare të vënies në vend të së drejtës së fituar me vendim gjyqësor, atëherë do ishte me vend që të gjitha subjektet, që ushtrojnë këtë aktivitet t’i nënshtrohen procesit të vettingut.
Sipas argumentimit të kreut të shtetit, një sistem përmbarimor që nuk funksionon si duhet, përbën gjithmonë një risk të lartë që konflikti gjyqësor të riciklohet dhe, e drejta e fituar, të humbasë apo të zhvleftësohet me kalimin e kohës. Së fundmi, Presidenti i Republikës, konstaton se gjatë procesit të diskutimit dhe miratimit të akteve në kuadër të realizimit të reformës në sistemin e drejtësisë Kuvendi nuk i ka kushtuar të njëjtën vëmendje edhe reformimit të shërbimit përmbarimor gjyqësor shtetëror.
Ky ligj u miratua në Kuvend më 8 maj dhe iu dërgua Presidencës për dekretim. Argumentet e plota të Presidentit i gjeni këtu./ Opinion.al
